Kryediplomati bleg sot në Prishtinë, pritet nga Kurti

Kurti pret sot në takim zyrtar ministrin e Jashtëm të Belgjikës, Maxime Prévot

Kryeministri i Kosovës, Albin Kurti, do të presë sot në një takim zyrtar zëvendëskryeministrin dhe ministrin e Punëve të Jashtme të Belgjikës, Maxime Prévot, përcjell albinfo.ch.

Sipas njoftimit të Zyrës së Kryeministrit, takimi do të mbahet në ndërtesën e Qeverisë së Kosovës, duke filluar nga ora 13:30, ndërsa mediat do të kenë mundësi të marrin pamje në oborrin e Qeverisë para nisjes së këtij takimi.

Ndërkohë, kryediplomati belg ka bërë të ditur se gjatë këtyre ditëve do të realizojë një vizitë në rajon, ku përfshihen Kosova, Mali i Zi, Serbia, Maqedonia e Veriut dhe Bosnjë e Hercegovina.

Sa i përket Shqipërisë, Prévot ka deklaruar se do ta vizitojë në një fazë tjetër, kur do të ketë, siç është shprehur ai, “kënaqësinë të hapë ambasadën belge në Tiranë”.

Vizita e tij në Kosovë vlerësohet si pjesë e angazhimit të Belgjikës për zhvillimin e marrëdhënieve diplomatike dhe bashkëpunimit me vendet e Ballkanit Perëndimor./Albinfo.ch

---