Futboll

Kuqezinjtë me shumë probleme

Christian Panucci po përballet me shumë mungesa para ndeshjes me Skocinë

Shqipëria është para një testi të vështirë, derisa po përballet me shumë mungesa.

Një 19-vjeçar kuqezi largohet nga Shpresat për t’iu bashkuar Kombëtarja A. Bëhet fjalë për Albion Ademin, i cili është thirrur me urgjencë nga trajneri Christian Panucci para dy takimeve të radhës me Skocinë në Ligën e Kombeve dhe Uellsin (miqësore).

Ademi është pjesë e skuadrës Inter Turku në Finlandë dhe aktivizohet si sulmues në të dy krahët, shkruajnë mediat shqiptare.

Më parë Ademi ka luajtur për të gjitha kombëtaret e moshave në Finlandë, por së fundmi është pajisur me pasaportë shqiptare, pasi ka vendosur të luajë për kuqezinjtë, përcjell albinfo.ch.

Eros Grezda ka vazhduar të stërvitet i diferencuar për shkak të një lëndimi në pulpën e djathtë, edhe pse do të provojë të bëjë gjithçka të jetë gati për ndeshjen e së shtunës. Veçmas grupit, ka zhvilluar stërvitje edhe mesfushori i Brescias, Emanuele Ndoj.

Ekipit i është bashkuar gjithashtu edhe Elhan Kastrati, ish-portieri i Teutës që tashmë është pjesë e Pescaras në Itali, duke zëvendësuar kështu Alban Hoxhën, i cili vazhdon të shfaqë probleme në ligamentin e gjurit të djathtë.

Ermir Lenjani, gjithashtu është largohet për shkak të lëndimit, derisa Ivan Balliu, ka pasur probleme me klubin e Metz në Francë, dhe gjithashtu nuk do të jetë pjesë e kuqezinjve.

Për shkak të kartonëve nuk do të luajnë Migjen Basha dhe Elseid Hysaj.