Le Temps: “Një flamur shqiptar i djegur”

Ambasada e Republikës së Kosovës në Konfederatën Helvetike

Naim Malaj, ambasador i Kosovës në Zvicër, është i indinjuar. Objekti i zemërimit të tij? Më 26 maj, një flamur shqiptar është djegur gjatë ndeshjes miqësore të futbollit në mes të Spanjës dhe Serbisë, e cila është zhvilluar në Saint-Gallen. Ai thotë se tifozët kanë brohoritur “vdekje shqiptarëve” në gjuhën serbe. “Le Temps” ka siguruar një foto të incidentit. Një video e shkurtë gjithashtu qarkullon në internet. Vërehen disa meshkuj të rinj, me fytyrë të mbuluar, të cilët mbajnë flamurin kuq e zi afër fushës dhe mundohen ta djegin.

“Këto vepra me karakter nacionalist janë primitive dhe raciste. Ato ngjallin urrejtjen dhe tensionet ndëretnike dhe duhet të dënohen. Përgjegjësit e këtyre akteve duhet të përballohen me drejtësinë”, komenton Naim Malaj. Ai rikujton që shumica e shqiptarëve që jetojnë në Zvicër kanë prejardhje nga Kosova.

Ambasada e Kosovës dhe ajo e Shqipërisë nuk qëndrojnë duarkryq. Kanë përgatitur një komunikatë të përbashkët për të denoncuar këto vepra. “Pasojat e zhvillimit të nacionalizmit primitiv në Ballkan kanë qenë të tmerrshme këto dekada të fundit. Është koha për t’i shëruar plagët dhe jo për t’i rihapur ato. Futbolli është një sport, i cili duhet të frymëzojë ndjenjat e solidaritetit dhe të miqësisë”, mund të lexojmë.

Dy ambasadat kërkojnë nga autoritetet zvicerane kompetente, Komisionit federal kundër racizmit, Lidhjes ndërkombëtare kundër racizmit dhe antisemitizmit (LICRA), Federatës ndërkombëtare të futbollit (FIFA) dhe Shoqatës zvicerane të futbollit, të ndërmarrin masat e duhura në mënyrë që këto vepra të mos mbesin të pandëshkuara.

Sipas informatave tona, ambasadori i Shqipërisë dhe ai i Kosovës kanë takuar një përfaqësues të Departamentit federal të punëve të jashtme lidhur me këtë çështje të martën në Bernë, në lokalet e misionit kosovar, i cili gjendet dy hapa pranë pallatit federal.