Mali i Zi voton për herë të tretë në 9 muaj

Qytetarët e Malit të Zi do të votojnë në zgjedhjet parlamentare këtë të diel.

Këto janë zgjedhjet e treta brenda 9 muajve në Mal të Zi dhe të drejtë vote kanë 542.468 votues që do të përcaktohen midis 15 listave zgjedhore.

Partia Demokratike e Socialistëve (PDS) për të parën herë hyn në zgjedhje pa liderin e saj Millo Gjukanoviq, i cili pas tri dekadash është tërhequr si lider i partisë, pasi në raundin e dytë të zgjedhjeve presidenciale humbi zgjedhjet kundrejt rivalit nga Lëvizja Evropa Tani, Jakov Millatoviq, shkruan DW.

Në zgjedhjet e së dielës për të parën herë ka hyrë në garë lëvizja “Evropa Tani”, e cila sipas sondazheve ka përkrahjen më të madhe të qytetarëve. Sondazhet e nxjerrin të dytën “Partinë Demokratike të Socialistëve” (PDS).

Fushata ishte e qetë, por që në javën e fundit ra nën hije për shkak të aferës së kriptovalutave, përcjell albinfo.ch.