Marigona Qerkezi rikthehet në “Anna Bolena” në Tirol

Sopranja shqiptare debuton në Tiroler Festspiele Erl me një nga rolet më sfiduese të belcantos

Sopranja e njohur shqiptare Marigona Qerkezi do të rikthehet në një nga rolet më të rëndësishme të repertorit të saj, duke interpretuar operën “Anna Bolena” të Gaetano Donizettit në kuadër të sezonit 2026/27, përcjell albinfo.ch.

Shfaqja do të mbahet më 2 janar 2027 në festivalin prestigjioz Tiroler Festspiele Erl, ku Qerkezi do të bëjë edhe debutimin e saj në këtë skenë të rëndësishme ndërkombëtare.

“Anna Bolena” është një nga veprat më kërkuese të repertorit belcanto, e cila kërkon jo vetëm teknikë të lartë vokale, por edhe interpretim të thellë emocional. Personazhi i mbretëreshës Anne Boleyn paraqet një figurë komplekse që ndërthur forcën, brishtësinë dhe dramën njerëzore.

Sopranja shqiptare e ka përshkruar këtë angazhim si një moment të veçantë në karrierën e saj, duke shprehur emocion dhe mirënjohje për mundësinë e rikthimit në këtë rol.

Ky projekt i ri e forcon edhe më tej pozitën e Marigona Qerkezit si një nga zërat më të rëndësishëm shqiptarë në skenën ndërkombëtare të operës./Albingo.ch

---