Marrëveshja paqësore me Kosovën kusht për pranimin e Serbisë në BE

Kjo marrëveshje do ta obligonte Serbinë që të hiqte dorë nga ndërtimi, udhëheqja dhe financimi i strukturave serbe në veri të Kosovës

Autoritetet e Kosovës nuk duhet të kënaqen vetëm me plotësimin e kushteve për menaxhim të integruar të kufirit, por duhet të kërkojnë edhe nënshkrimin e një Marrëveshje të Paqes mes Serbisë dhe Kosovës.

Kështu lufta në Kosovë do të njihej edhe zyrtarisht si e tillë dhe nuk do të quhej më konflikt, siç po e quan ndonjëherë naivisht edhe vetë kryetarja e Kosovës, Serbia si palë luftënxitëse do të obligohej të merrte përsipër gjetjen e të zhdukurve nga lufta përkatësisht do të obligohej t’i hetonte drejtuesit e saj policorë – ushtarakë të operacioneve luftarake në Kosovë, si dhe të merrte përsipër kompensimin e dëmeve të shkaktuara nga kjo luftë.

Kjo marrëveshje do ta obligonte atë që të hiqte dorë përfundimisht nga ndërtimi, udhëheqja dhe financimi i strukturave serbe në veri të Kosovës.

Zatën, nënshkrimi i marrëveshjeve të tilla është parakusht për çdo vend kandidat të BE-së të përfshirë në konflikte. Gjithashtu, plotësimi i kriterit për respektimin e të drejtave të pakicave, si dhe e së drejtës për qarkullim të lirë të mllrave janë ndër kriteret bazë, të njohura si kriteret e Kopenhagës, për pranimin e anëtarëve të rinj në BE.

Autoritetet e Kosovës kanë për detyrë që katalogun e kritereve për pranim ta studiojnë mirë, jo vetëm për të kushtëzuar Serbinë me nënshkrimin e marrëveshjeve të caktuara, të cilat Kosovën do ta njihnin de facto si shtet, por edhe për të qenë në dijeni se si duhet të ecin vetë drejt përmbushjes së kritereve për të fituar statusin e vendit kandidat në BE.

Natyrisht se kriteret bazë – lufta kundër korrupcionit dhe funksionimi i shtetit ligjor – janë ende larg jo vetëm nga përmbushja, por edhe nga vetë fillimi i funksionalizimit të tyre.