Mbahet testi  i maturës, sërish shpërndahen testet në rrjetet sociale

Përkundër paralajmërimeve se nuk do të lejoheshin shkelje të tilla si në afatet e kaluara, një gjë e tillë përsëri ka ndodhur dhe shumë teste kanë qarkulluar nëpër disa grupe të caktuara

Mbi 7 mijë maturantë të shkollave të mesme, të cilët nuk patën sukses në afatin e parë të testit shtetëror të maturës, kanë marrë pjesë në afatin e gushtit.

Që nga ora 10 e mëngjesit në të gjitha qendrat e përcaktuara testi ka nisur me kohë. E, me këtë, si edhe herëve të tjera, ka nisur edhe qarkullimi nëpër rrjete sociale i testeve të maturës shtetërore. Përkundër paralajmërimeve se nuk do të lejoheshin shkelje të tilla si në afatet e kaluara, një gjë e tillë përsëri ka ndodhur dhe shumë teste kanë qarkulluar nëpër disa grupe të caktuara.

Megjithatë, ministri i Arsimit, Shyqiri Bytyqi, ka thënë se procesi ka shkuar pa asnjë problem.

Ndërsa, drejtori i Arsimit në Prishtinë, Jonuz Salihaj, ka thënë se i vetmi telash me të cilin është përballur kësaj radhe procesi është se një numër i maturantëve kanë vendosur të mos i përgjigjen thirrjes për të hyrë në test, përkundër njoftimeve me kohë.

---