Lajme

Mbretëria e Bashkuar takson me 6 miliardë dollarë kompanitë e naftës dhe të gazit

Qeveria e Mbretërisë së Bashkuar do të vendosë një taksë prej 5 miliardë paund (6.3 miliardë dollarë) mbi fitimet e papritura të kompanive të naftës dhe të gazit, duke iu nënshtruar kështu presionit nga aktivistët që kërkonin mbledhjen e parave për të ndihmuar miliona njerëz që po luftojnë me krizën më të rëndë të rritjes së kostove të jetesës në dekadat e fundit.

Ministri i Financave, Rishi Sunak, zbuloi të enjten taksën e re prej 25% mbi fitimet e prodhuesve të energjisë si BP dhe Shell. Taksa do të hiqet pasi çmimet e naftës dhe të gazit të kthehen në nivele më normale, tha ai.

“Sektori i naftës dhe i gazit po nxjerr fitime të jashtëzakonshme, jo si rezultat i ndryshimeve, i marrjes së riskut të shtuar apo i inovacionit dhe efikasitetit, por si rezultat i rritjes së çmimeve në rang global”, tha Sunak në një fjalim në Parlament.

Taksa do të ndihmojë në financimin e një pakete të re mbështetjeje me vlerë rreth 15 miliardë paund (19 miliardë dollarë). Sunak tha se qeveria do të bëjë pagesa direkte për miliona familje që janë më vulnerabël. Rreth tetë milionë familje me të ardhura të ulëta do të marrin 650 paund në dy këste gjatë këtij viti, ndërsa tetë milionë pensionistë të tjerë do të marrin 300 paund.

Kompanitë, duke përfshirë BP dhe Shell, arritën një fitim të përbashkët prej 32 miliardë dollarësh vitin e kaluar, si rezultat i rritjes së çmimeve globale të naftës dhe të gazit natyror. Pushtimi rus i Ukrainës në shkurt i rriti akoma më tepër çmimet, nga frika se konflikti do të sillte mungesa të energjisë.

Konsumatorët familjarë kanë qenë më të ndikuarit nga këto rritje të ҫmimeve. Të martën kreu i agjencisë rregullatore të energjisë në Mbretërinë e Bashkuar tha se priste që faturat vjetore për miliona familje të rriteshin me 40%, duke shkuar në rreth 2,800 £ (3,500 dollarë) nga muaji tetor, vetëm gjashtë muaj pasi kjo agjenci rriti kufirin e çmimeve të energjisë (nivelin maksimal që furnitorët mund t’i faturojnë klientëve për njësi të energjisë) me 54%, rritja më e madhe që nga vendosja e kufizimeve për këto çmime pesë vjet më parë.

Faturat e energjisë kanë nxitur rritjen e çmimeve në të gjithë ekonominë. Në prill, inflacioni i çmimeve të konsumit në Mbretërinë e Bashkuar arriti në 9% – niveli më i lartë në 40 vjet. Dhe, duke qenë se pagat nuk janë rritur me të njëtin ritëm si kostot e ushqimit dhe të karburantit, standardet e jetesës kanë rënë përsëri në nivelin më të ulët që nga vitet 1950, sipas Zyrës së Mbretërisë së Bashkuar për Përgjegjësinë Buxhetore.

Në shkurt, Sunak bëri publike një masë lehtësuese, duke u ofruar familjeve 200 paund zbritje nga faturat e tyre të energjisë duke filluar nga muaji tetor, para të cilat do të duhet të paguheshin me këste gjatë viteve të ardhshme. Të enjten, Sunak dyfishoi masën e kësaj zbritjeje dhe tha se nuk do të duhej që të paguhej asgjë nga konsumatorët në vazhdim.

“Kjo mbështetje tani mund të konsiderohet pa dyshim si një grant”, tha ai.

Financial Times raportoi në fillim të kësaj jave se qeveria do të targetonte gjithashtu fitimet e mëdha të kompanive prodhuese të energjisë elektrike si EDF dhe RWE. Por, Sunak tha se departamenti i tij kishte nevojë për më shumë kohë që të dilte me një plan konkret për sektorin e energjisë elektrike.

Aktivistët në Mbretërinë e Bashkuar i mirëpritën masat e shpallura të enjten.

“Kancelari i ka dëgjuar qartë shqetësimet se duhet rritur mbështetja për ata që janë në vështirësi për të siguruar energji, duke u fokusuar te grupet më vulnerabël”, tha për CNN Business Simon Francis, koordinator për Koalicionin “End Fuel Poverty”.

Francis shtoi se, edhe pse masat e reja do të përmirësojnë situatën e rritjeve të fundit të çmimeve të energjisë, njerëzit në pamundësi për të siguruar energji kishin nevojë për më shumë siguri se mbështetja do të vazhdojë edhe në planin afatmesëm. /CNN


LAJME INTERESANTE NGA INTERNETI