Me 47 milionë franga, Xhaka thyen rekordin zviceran

Granit Xhaka është bërë futbollisti më i shtrenjtë në historinë e Zvicrës me kalimin në Arsenal për 47 milionë franga

Tashmë mungon vetëm zyrtarizmi që Granit Xhaka të jetë futbollist i Arsenalit. Ai ka pozuar me fanella të skuadrës angleze, derisa ende nuk dihet shuma e saktë e transferimit, shkruan albinfo.ch.

Por, sipas mediave zvicerane, ai do të transferohet nga Borussia Moenchengladbach për 47 milionë franga në Arsenal. Një rekord për futbollin zviceran, edhe pse Graniti me prejardhje është nga Kosova.

Rekordin deri më tani e mbante Gokhan Inler, i transferuar te Napoli. Xherdan Shaqiri u transferua për rreth 17 milionë euro në Inter dhe më pas në Stoke City. Xhaka kur të zyrtarizohet do të thyejë rekordin e futbollit zviceran.

Por, ai gjithashtu mund të bëhet lojtari i dytë më i paguar në historinë e Arsenalit, pasi do të përfitojë 100 mijë funte në javë ose 130 mije euro, ndërsa më shumë se ai paguhet vetëm gjermani Mesut Ozil. Gjatë një sezoni shuma që ai do të përfitojë shkon në 6.2 milionë euro.