Më shumë aksidente në Kosovë

Janar-maj 2011 është shënuar ngritje e aksidenteve, ku vetëm këtë vit janë shënuar 6603 aksidente

Policia e Kosovës raporton se ka ngritje të numrit të aksidenteve në komunikacion në rrugët e Kosovës. Sipas autoriteteve të rendit, ka shënuar rënie numri i aksidenteve me fatalitet.

Ata thonë se gjatë vitit 2011 kanë vdekur 55 persona në aksidente komunikacioni, derisa 13 prej tyre kanë qenë këmbësorë.

Baki Kelani, zyrtar për informim në Policinë e Kosovës, i ka thënë Radio Evropës së Lirë se Policia e Kosovë në kuadër të planit strategjik zhvillimor 2011- 2015 ka paraparë që numri i aksidenteve të jetë sa më i vogël, duke hartuar plane për këtë çështje, derisa, sipas tij, kjo ka rezultuar me sukses.

Sipas policisë, nëse bëhet krahasimi i periudhës kohore janar-maj 2010 me atë janar-maj 2011 është shënuar ngritje e aksidenteve, ku vetëm këtë vit janë shënuar 6603 aksidente.

Ndërkaq, sa i përket këmbësorëve, 13 njerëz kanë vdekur si pasojë e goditjes nga automjetet në trotuaret e rrugëve. Policia thotë se krahasuar me vitin e kaluar, ka rënie të personave që kanë humbur jetën si këmbësorë.

Në bazë të dhënave të policisë nëse krahasohet me vitin e kaluar, ka një rënie prej rreth 50 për qind, pasi që vitin e kaluar kanë vdekur 24 njerëz në periudhën e njëjtë janar-maj.

Ekspertët e shkencave të komunikacionit, thonë se shkaktarët që ndikojnë në aksidente të komunikacionit janë të shumtë. E, përgjegjësi kryesor është faktori njeri, duke mos i respektuar rregullat e komunikacionit. Rregullat që janë të obligueshme të respektohen..

Edhe qytetarët të intervistuar nga Radio Evropa e Lirë mendojnë se deri tek aksidentet ndikojnë shumë faktorë, por kryesor, sipas tyre, është marrja e patentë-shoferit në autoshkollat private në mënyrë shumë të lehtë.