Tematike

Më shumë se gjysma e emigrantëve ikin sërish nga Zvicra

Jo të gjithë ata që emigrojnë qëndrojnë më gjatë në Zvicër. Zyra Federale e Statistikave ka ekzaminuar lëvizjet dhe ka ardhur në përfundime interesante

Zvicra, siç dihet, është prej kohësh një vend i imigracionit. Deri në 200,000 njerëz emigrojnë nga jashtë çdo vit, por, në afat më të gjatë po aq largohen nga Zvicra. Zyra Federale e Statistikave  (BFS) tani ka studiuar lëvizjen e migrantëve, duke kërkuar përgjigjet për pyetjet: Sa prej tyre qëndrojnë këtu me vite dhe kush largohet pas një kohe të shkurtër?

BFS me këetë rast ka marrë vitin 2011 si pikënisje. Ajo ka kërkuar të dijë se sa njerëz kanë emigruar në Zvicër në atë kohë dhe nga cilat kontinente kanë ardhur, transmeton albinfo.ch. Më pas statisticienët kanë shikuar se si kanë vazhduar zhvillimet në jetën e emigrantëve.

Dhe, ata kanë dalë në përfundimin se shumica nuk qëndrojnë këtu. Nga 223,000 njerëz që kanë emigruar në Zvicër në vitin 2011, 52 për qind kanë emigruar përsëri dhjetë vjet më vonë, shpjegon Johanna Probst nga BFS.

Amerikanët largohen më së shpejti

Në këtë këndvështrim ka dallime të mëdha  sa u përket rajoneve të prejardhjes së emigrantëve. Përqindja e të kthyerve është më e madhe në mesin e njerëzve nga Amerika e Veriut, shkruan srf.ch. Plot 80 për qind e tyre janë larguar nga Zvicra dhjetë vjet pas imigrimit.
BFS supozon se shumica e tyre janë të ashtuquajtur “Expatë”, d.m.th. punëtorë të lëvizshëm, të kualifikuar të cilët kanë qëndruar në Zvicër për një periudhë të kufizuar kohore për arsye profesionale.

Çdo i dyti emigrant kthehet

Migrimi nga Afrika rezulton gjithashtu i habitshëm: 40 për qind e afrikanëve të ardhur në Zvicër janë larguar nga Zvicra pas vetëm gjashtë muajsh. Këtu supozohet se në mesin e tyre ka shumë persona që kanë aplikuar pa sukses për azil në Zvicër dhe më pas janë larguar nga vendi.

Kohëzgjatja e shkurtër e qëndrimit të shumë afrikanëve është në kontrast me atë të njerëzve nga Amerika e Jugut: 90 për qind e tyre janë ende në Zvicër pas gjashtë muajsh.

Në terma numerikë, imigracioni evropian përbën pjesën mbizotëruese në Zvicër, transmeton albinfo.ch. Më shumë se 100,000 njerëz emigrojnë nga Evropa çdo vit në shtetin helvetik. Në krahasim, me Evropën shumë më pak njerëz vijnë nga Afrika ose Amerika e Jugut, gjithsej nga 5000 në vit.

Migrimi në asnjë mënyrë nuk çon gjithmonë në një vendosje të përhershme.

Shifrat tregojnë se ka lëvizje shumë të ndryshme migrimi dhe se grupe të ndryshme origjine kanë shanse krejtësisht të ndryshme për të marrë leje të përhershme qëndrimi në Zvicër.

“Të dhënat e publikuara tani tregojnë se migrimi në asnjë mënyrë nuk çon gjithmonë në një instalim të përhershëm,” thotë Probst nga BFS. Migrimi shpesh është i kufizuar në kohë. Kjo dhe është arsyeja pse ajo konsideron se studimi i BFS ka vlerë informative.

Një vështrim i ri në debatin për migracionin

Studiuesi i migracionit Gianni D’Amato nga Universiteti i Neuchâtel-it preferon një pamje të diferencuar të imigracionit. Ai ka studiuar këtë temë prej më shumë se 20 vitesh. “I gjithë diskutimi i integrimit ka të bëjë me njerëzit që qëndrojnë, që mbeten të jetojnë në Zvicër. Por ka edhe shumë që largohen sërish”, konkludon ai, përcjell albinfo.ch. Ky fakt pasqyron lëvizshmërinë e madhe që është karakteristikë e shoqërive moderne.

Me studimin e saj të ri, Zyra Federale e Statistikave synon të bëjë pjesën e saj të punës për të lehtësuar një diskutim më të gjerë rreth migrimit dhe imigracionit.


LAJME INTERESANTE NGA INTERNETI