Lajme

Mocion në Zvicër: Nuk duam turistë të huaj nga vende të largëta

Deputeti i Gjelbër, Christophe Clivaz, paraqiti një mocion në Parlament, duke kërkuar që subvencioni federal për turizmin të mos përdoret më për të tërhequr turistë nga Shtetet e Bashkuara, Kina dhe vende të tjera nga jashtë Evropës, njofton albinfo.ch.

“Është kontradiktore të promovosh turizmin e qëndrueshëm dhe, në të njëjtën kohë, të inkurajosh ardhjen e vizitorëve të largët me avion”, tha ai, duke argumentuar se një fluturim nga Los Angeles për në Gjenevë lëshon 3.1 tonë CO₂. Një fluturim i tillë “korrespondon me më shumë se gjysmën e gjurmës mesatare vjetore të karbonit të një personi që jeton në Zvicër”, tha Clivaz.

Organi zyrtar i turizmit, Switzerland Tourism, u përgjigj se Zvicra nuk duhet të veçohet, sepse reduktimi i gjurmës së karbonit “duhet të ndodhë në shkallë globale”.

Nëse turistët nga vendet e largëta do të anashkalonin Zvicrën, kjo “nuk do të kishte efekt në emetimet e CO₂, por një ndikim shumë negativ ekonomik dhe social për Zvicrën”, tha organi i turizmit.  /Albinfo.ch