“Nga anëtarësimi i Kosovës në INTERPOL, fitojnë të gjithë”

Ministria e Punëve të Jashtme të Kosovës thotë se procesi i anëtarësimit të Kosovës në INTERPOL i kontribuon fuqishëm rritjes së efikasitetit të bashkëpunimit fqinjësor, rajonal dhe ndërkombëtar në parandalimin dhe luftimin e krimit-transnacional.

Ministria e Punëve të Jashtme është thellësisht e bindur se ky proces i shërben jo vetëm interesit kombëtar të shtetit të Kosovës dhe shtetasve të saj, por edhe të gjitha shteteve anëtare të kësaj organizate dhe shtetasve të tyre.

Kjo ministri thotë se ua ka prezantuar me kohë argumentet e saj bindëse ligjore dhe profesionale të gjitha shteteve anëtare në mbështetje të anëtarësimit të vendit në këtë organizatë dhe u bën thirrje edhe një herë të gjitha shteteve anëtare që të votojnë në favor të rritjes së efikasitetit të bashkëpunimit fqinjësor, rajonal dhe ndërkombëtar në parandalimin dhe luftimin e krimit-transnacional, respektivisht anëtarësimit të Kosovës.