Nataliteti në Shqipëri më i ulëti në 100 vjetët e fundit

Gjatë vitit 2016, numri i lindjeve në Shqipëri ishte 31,733, afro një mijë lindje më pak nga viti 2015 dhe 4 mijë lindje më pak se sa në vitin 2014

(KEYSTONE/Gaetan Bally)

Vitit 2016 shënon numrin më të ulët të natalitetit në Shqipëri, prej viti 1930 nga koha kur shteti shqiptar filloi të mbaj regjistra mbi lindjet dhe vdekjet. Sipas statistikave, gjatë vitit 2016 kanë lindur rreth 32 mijë foshnje, duke paralajmëruar për një krizë të rëndë demografike në të ardhmen e afërt. Shifrat tregojnë se Shqipëria po plaket.

Përgjatë vitit 2016, numri i lindjeve ishte 31,733, afro një mijë lindje më pak nga viti 2015 dhe 4 mijë lindje më pak se sa në vitin 2014, citon Birn.

Shqipëria ka pasur mbi 30 mijë lindje në vit që nga viti 1929, kur lindjet filluan të numërohen përmes themelimit të regjistrit civil. Në vitet 1980, lindjet qenë mbi 60 mijë në vit ndërsa në vitin 1990, lindjet arritën në 82 mijë. Pas vitit 1990, numri i lindjeve ra vazhdimisht deri sa u stabilizua pas vitit 2006 në rreth 35 mijë.

Arsyet kryesore të rënies së lindjeve pas viteve ’90, siç thuhet lidhen me ndryshimet kulturore në familjen shqiptare si dhe me shkallën e lartë të emigrimit mes të rinjve, emigrim që sjell detyrimisht rënie të martesave e të lindjeve.

Rreth vitit 2008, besohej se numri i lindjeve u stabilizuar tashmë, pasi treguesi tjetër kyç, raporti i fëmijëve nën 14 vjeç me numrin e grave në moshë riprodhuese, ra në 1.6 fëmijë për grua, para se të rritej lehtë në 1.8 fëmijë për grua. Por, rënia e mëtejshme e numrit të lindjeve në vitet 2015 dhe 2016, rënie që ka gjasa është shkaktuar nga vala e re e emigrimit të popullsisë shqiptare drejt Evropës, pritet të ketë pasoja të shumëfishta të rënda për demografinë, ekonominë dhe shoqërinë shqiptare në dekadat e ardhshme.

Ndryshe, sipas të të njëjtave statistika, numri i fëmijëve nën 14 vjeç, aktualisht 522 mijë, pritet të bjerë më tutje gjatë viteve të ardhshme ndërkohë që numri i shqiptarëve mbi 65 vjeç, aktualisht 378 mijë, pritet të rritet me shpejtësi.