Në Zvicër ndalohen tri modele të veturave gjermane me naftë

(KEYSTONE/Melanie Duchene)

Agjencia Zyrtare e Rrugëve në Zvicër (FEDRO) ka marrë vendim që nga kjo e premte (sot) të ndalojë modelet Mercedes Vito, Porsche SUV Cayenne dhe Macan me motorë dizelë, shkruajnë mediat zvicerane.

Ky vendim është i përkohshëm dhe nuk do të lejojë regjistrimin e këtyre modeleve, për shkak të niveleve të tepërta të shkarkimeve të gazrave të dëmshme, përcjell albinfo.ch.

Sipas Agjencisë Zvicerane të Rrugëve, këto automjete mund të regjistrohen vetëm si të reja, nëse i plotësojnë të gjitha kushtet.

Këto modele ndotin mjedisin më shumë se sa që prodhuesit kanë deklaruar zyrtarisht në dokumentacion.

Ndalimi vlen për Mercedes Vito me një motor diesel 1.6 litërsh, Porsche Macan 3.0-litra V6 naftë dhe Cayenne 4.2-litërsh V8 diesel.

Gjithashtu më herët janë ndalur modelet Audi A6 dhe A7, pasi prodhuesi gjerman i makinave ishte kritikuar për mashtrim.

Në qendër të dyshimeve ishte motori me gjashtë cilindra dizel, i instaluar në rreth 60,000 automjete A6 dhe A7 që nga viti 2014.

Skandali i emetimeve të Volkswagen ka peshuar rëndë në grupin e makinave gjermane që nga vjeshta e vitit 2015, kur Agjencia e Mbrojtjes së Mjedisit të SHBA (EPA) akuzoi Volkswagen për përdorimin e softuerit të manipulimit për të falsifikuar testet e emisioneve në rreth 11 milionë automjete dizelë.