Nga shtatori, të huajt në administratën publike

Megjithatë, tani për tani, mundësitë e reja u jepen vetëm emigrantëve me qëndrim afatgjatë në Itali

Nga 4 shtatori të huajt në Itali do të gëzojnë të drejta të barabarta si vendësit. Edhe ata që nuk kanë shtetësinë italiane do të mund të punësohet në administratën publike të vendit.

Kështu thotë ligji evropian 2013, i sapopublikuar në Gazetën Zyrtare, por që përcakton dy kufizime.
Para së gjithash, shtetasit e huaj mund të marrin pjesë në konkurset publike vetëm po të kenë lejen e qëndrimi CE, ose po të gëzojnë statusin e refugjatit apo mbrojtjen humanitare.

Për më tepër, nuk duhet të “ëndërrojnë” vende pune në të cilat ushtrohet, në mënyrë të drejtpërdrejtë apo të tërthortë, autoriteti shtetëror apo mbrohet interesi nacional.  Me këtë Italia përshtat normativën e vendit me atë evropiane.

Konventa e Organizatës Ndërkombëtare të Punës 143/1975, e ratifikuar nga Italia, barazon punonjësit e huaj me qëndrim të rregullt me punonjësit vendës, ndaj shumë ekspertë kërkojnë që në administratën publike t’u jepet mundësia të punojnë të gjithë ata që kanë një dokument qëndrimi që është i vlefshëm për të punuar.

Megjithatë, tani për tani, mundësitë e reja u jepen vetëm emigrantëve me qëndrim afatgjatë në Itali. Por, edhe këta duhet të shpresojnë në hapjen e ndonjë vendi pune në administratën publike, që është gjithnjë e më e rrallë në këtë periudhë krize në Itali, shkruan “Shqiptari i Italise”