Nikki Haley tërhiqet zyrtarisht nga gara presidenciale në SHBA

Ish-ambasadorja e Kombeve të Bashkuara, Nikki Haley, e ka pezulluar sot zyrtarisht fushatën e saj presidenciale për zgjedhjet e nëntorit në Shtetet e Bashkuara të Amerikës.

Dorëheqja e saj i ka hapur rrugë ish-presidentit Donald Trump që të jetë i vetmi kandidat republikan, transmeton albinfo.ch.

Haley ka deklaruar se nuk ndihet e penduar për këtë vendim, teksa vendimi i saj vjen një ditë pas disfatës së dukshme nëpër disa shtete të SHBA-së gjatë “Super Tuesday”.

“Tani ka ardhur koha për të pezulluar fushatën time. Thashë se doja që të dëgjoheshin zërat e amerikanëve. E kam bërë këtë. Nuk jam penduar. Edhe pse nuk do të jem më kandidate, nuk do të ndalem së përdoruri zërin tim për gjërat në të cilat besoj”, ka thënë ajo.

Ndryshe, ripërsëritja e garës ndërmjet Donald Trump, 77-vjeçar dhe Joe Biden, 81-vjeçar, është e para në zgjedhjet amerikane që nga zgjedhjet e vitit 1956.