Shqipëria

Nis Java e Kulturës Gjermane në Tiranë, zgjat deri më 9 tetor

Kjo javë sjell aktivitete të përvitshme të kulturës gjermano-shqiptare, të cilat në Shqipëri organizohen rregullisht që nga viti 2007.

Sot në Tiranë ka nisur Java e Kulturës Gjermane, e cila përkon me “Tetorin gjerman”. Kjo javë sjell aktivitete të përvitshme të kulturës gjermano-shqiptare, të cilat në Shqipëri organizohen rregullisht që nga viti 2007.

Këtë vit Ambasada gjermane në Tiranë tha se motoja e këtyre aktiviteteve do të jetë “Përndritje”, raporton atsh, përcjell Albinfo.ch.

Java Gjermane nis sot e do të vijojë deri më 9 tetor. Përgjatë saj do të ketë diskutime mbi libra shqiptarë të përkthyer në gjermanisht, siç është romani i Stefan Çapalikut, “Secili çmendet sipas mënyrës së vet”, apo edhe diskutime mbi letërsinë gjermane të përkthyer në shqip, të cilat do të zhvillohen në Qendrën Kombëtare të Librit e Leximit.

Përkthyeset Marsela Likaj, Anna Kove dhe studiuesja Anila Mullahi do të diskutojnë rreth letërsisë gjermane të përkthyer në shqip, duke u ndalur tek Gëte, Shiler dhe Hajne, shkrimtarët më të përkthyer në shqip në gjysmën e parë të shekullit XX.

Por, një vëmendje e veçantë do t’i kushtohet shkrimtares Herta Müller dhe letërsisë së saj, letërsi e cila rrëfen tmerret e diktaturës, ndjenjën mizore të spiunimit të vazhdueshëm dhe mungesën e lirisë së shprehjes, frikën për të lëvizur, për të folur, për t’i besuar njëri-tjetrit.

Ditët e “Javës gjermane” do të kenë edhe kinematografi, ekspozitë fotografike (në COD), shfaqje teatrale (në Durrës), çiklizëm (udhëtim nga Pogradeci në Lin), muzikë nga mjeshtrat Beethoven e Brahms, si dhe për t’u veçuar një ligjëratë nga Bernd Borchardt, për mbrojtjen dhe persekutimin e hebrenjve në krahinat shqipfolëse.

Java e kulturës gjermane do të mbyllet me performancën koreografike DUA, në Teatrin Kombëtar të Operas e Baletit./Albinfo.ch


LAJME INTERESANTE NGA INTERNETI