Kosova

Nis takimi Vetëvendosje – LDK

Në zyrat e Kuvendit të Kosovës ka filluar mbledhja në nivel të liderëve në mes të Lidhjes Demokratike të Kosovës dhe Lëvizjes Vetëvendosje.

E enjte, 28 Nëntor 2019 - 16:40 albinfo.ch

Dy partitë sot do të diskutojnë për ndarjen e ministrive dhe për emërimin e postit të presidentit pas rreth 2 viteve. Për çështjet tjera ndërkaq janë dakorduar në nivel të grupeve punuese.

Nga Lëvizja Vetëvendosje të pranishëm janë kreu i partisë, Albin Kurti, nënkryetari Besnik Bislimi, nënkryetarja Fatmire Kollçaku si dhe anëtarja e kryesisë, Albulena Haxhiu.

Prej LDK-së ndërkaq janë kreu i partisë, Isa Mustafa, nënkryetari i parë, Agim Veliu, nënkryetari Lutfi Haziri, kandidatja për kryeministre dhe nënkryetarja e partisë, Vjosa Osmani dhe anëtari i kryesisë, Avdullah Hoti.

Kjo mbledhje vjen pas shpalljes përfundimtare të rezultatit të zgjedhjeve të gjashtë tetorit, që e konfirmoi si parti të parë Lëvizjen Vetëvendosje, derisa, si më të votuarin, Albin Kurtin, kreun e kësaj partie.

LDK dhe VV që para zgjedhjeve kanë biseduar për një koalicion të mundshëm, derisa, pas gjashtë tetorit kishin filluar takimet në mes të grupeve punuese për koordinim të programit, shkruan GE, përcjell albinfo.ch