Nisi “PriFilmFest-i”

Edicioni i tretë i festivalit ndërkombëtar të filmit në Prishtinë, “PriFilmFest”, është hapur të shtunën mbrëma në dy lokacione.

Njëri në kinemanë e vetme në kryeqytet dhe tjetri në Teatrin Kombëtar të Kosovës.

Gjithçka ka nisur në Kinemanë ABC para së cilës qëndronte qilimi i kuq.

Në ekranin e madh është dhënë për herë të parë në Kosovë filmi “Falja e gjakut” me regji të Joshua Martsonit.

Ekskluzivisht për hapjen e festivalit, Martson ka folur në të dy ceremonitë.

Për të ardhja në Kosovë për së dyti herë ka një lezet tjetër.

“Isha këtu më parë për audicionet e filmit. Nuk kisha shumë kohë për të folur me njerëz. Por besoj se kjo më ka bërë mirë, sepse gjatë këtyre audicioneve kam takuar dhe njohur aktorë të mrekullueshëm dhe jashtëzakonisht të talentuar”, ka thënë Marston.

Filmi i tij “Falja e gjakut” që edhe ka hapur “PriFilmFestin”, gjatë këtij viti është shfaqur në shumë festivale të njohura të filmit si ai Sidneyt dhe i Berlinit.

Në këtë të fundit filmi ka fituar çmimin “Ariun e argjendtë” për skenarin më të mirë. Ndërsa dy ditë më parë filmi është zgjedhur që të jetë përfaqësuesi i kinematografisë shqiptare për çmimin “Oscar”.