Sulmet kibernetike të fuqizuara nga inteligjenca artificiale po rriten, bizneset bëhen objektiv i kriminelëve online

Ilustrim, Pixabay

Ekspertët e sigurisë kibernetike po paralajmërojnë për një rritje të përdorimit të inteligjencës artificiale nga grupet kriminale, të cilat po e shfrytëzojnë këtë teknologji për të realizuar sulme më të sofistikuara dhe më bindëse ndaj kompanive dhe institucioneve në mbarë botën.

Sipas të dhënave të raportuara nga transmetuesi publik finlandez Yle, autoritetet e sigurisë kibernetike në Finlandë vlerësojnë se niveli i kërcënimeve mbetet i lartë. Ndër format më të përhapura të sulmeve vazhdojnë të jenë mashtrimet përmes “phishing”, sulmet me programe bllokuese (“ransomware”), marrja nën kontroll e llogarive dhe goditjet ndaj zinxhirëve të furnizimit.

Eksperti i sigurisë kibernetike Mikko Hypponen, drejtor i kërkimeve në kompaninë Sensofusion, thekson se inteligjenca artificiale ka rritur ndjeshëm efikasitetin e aktiviteteve kriminale në internet. Përmes IA-së, sulmuesit mund të krijojnë programe keqdashëse, të hartojnë mesazhe mashtruese, të analizojnë objektivat dhe të automatizojnë pjesë të ndryshme të sulmeve.

Sipas Hypponen, përparimi i modeleve të gjuhës ka hequr edhe pengesat gjuhësore, duke bërë që mashtrimet online të duken më të besueshme. Ai vuri në dukje se inteligjenca artificiale tashmë mund të prodhojë tekste shumë të sakta edhe në gjuhë komplekse si finlandishtja.

Nga ana tjetër, drejtori i përgjithshëm i Qendrës Kombëtare të Sigurisë Kibernetike të Finlandës (NCSC-FI), Anssi Kärkkäinen, deklaroi se IA-ja po i bën sulmet kibernetike më të shpejta, më të lira dhe më bindëse, sidomos kur kriminelët përpiqen të paraqiten si persona ose organizata të besueshme.

Megjithatë, ekspertët theksojnë se inteligjenca artificiale nuk është faktori i vetëm që ka ndikuar në rritjen e kërcënimeve kibernetike. Ndër shkaqet kryesore përmenden interesat financiare të sulmuesve, mungesa e masave të duhura mbrojtëse dhe zgjerimi i vazhdueshëm i pajisjeve dhe sistemeve të lidhura me internetin.

Një raport i kompanisë “Check Point Software Technologies” ka evidentuar gjithashtu rritje të sulmeve kibernetike ndaj objektivave në Finlandë krahasuar me të njëjtën periudhë të vitit të kaluar. Sektorët më të prekur përfshijnë arsimin, kërkimin shkencor, administratën publike dhe telekomunikacionin.

Specialistët u bëjnë thirrje organizatave që të investojnë më shumë në mbrojtjen kibernetike, përmes përditësimit të vazhdueshëm të sistemeve, monitorimit të pajisjeve, forcimit të kontrolleve të sigurisë dhe krijimit të kopjeve rezervë të sigurta të të dhënave.