Një për qind të punësuar më shumë

Sipas të dhënave të Entit Federal Statistikor në Zvicër numërohen 4 milion e 618 mijë njerëz të punësuar

Numri i të punësuarve në Zvicër është rritur për 1 për qind në kuartalin e tretë të këtij viti në krahasim me një vit më parë. Aktualisht, sipas të dhënave të Entit Federal Statistikor në Zvicër numërohen 4 milion e 618 mijë njerëz të punësuar, njofton gazeta NZZ. Ky numër nuk vlen njësoj për shtetasit zviceranë dhe të punësuarit me shtetësi të huaj. Kështu, përderisa vetëm 0.4% më shumë zviceranë i janë shtuar tregut të punës, janë 2.5% më shumë të huaj që kanë zënë vend ndërkohë në këtë treg.

Dallime ka po ashtu edhe në strukturën gjinore. Numri i burrave të punësuar ka shënuar gjatë kësaj periudhe një ngritje prej 1.9% ndërsa vetëm 0.1% më shumë gra janë punësuar në të njëjtën kohë.

Enti i Statistikës ka publikuar edhe numrin e të papunëve, të llogaritur sipas definicionit të Organizatës së Punës të OKB-së. Ky numër në kuartalin e tretë të vitit që po shkon ishte 210 mijë, që është për 0.2% më i madh se një vit më parë dhe kap shifrën 4.6%.

Ndërkaq, Enti i Statistikave preferon llogaritjen tjetër, atë të bërë sipas kritereve të SECO-s (Sekretariati për Ekonomi). SIpas kësaj llogaritjeje shkalla e papunësisë në Zvicër në nëntor ishte 3.6 për qind.