Papunësia: dallime të mëdha në mes të kantoneve

Dallimi më i madh është në mes të kantonit të Gjenevës me 6.9% të papunë dhe atij Appenzell Innerhoden me shkallën 1.1% të papunësisë

Përqindja e të papunëve në gjithë Zvicrën, shikuar sipas viteve, nuk ka pësuar ndryshime dramatike, ndërsa, kur është fjala për përqindjet brenda regjioneve të vendit, janë identifikuar dallime relativisht të mëdha nga kantoni në kanton.

Kështu, siç njofton Sekretariati Shtetëror për Ekonomi, SECO dallimet më të mëdha janë ato në mes të kantoneve frankofone si Gjeneva me 6.9% të papunë ose Neuchatel-i me 6.2% dhe disa  kantoneve të vogla gjermanofone si Appenzell Innerhoden me 1.1% apo Obwalden me gjithsej 1.2% njerëz që presin në entet e punës.

Po kështu shkallë të lartë të papunësisë kanë edhe kantonet si ai i Tiçinos me 5.7%, i Vaudit 5.6% dhe i Valisit 5.4%.

Kantonet e mëdha gjermanofone si Cyrihu me 3.7 dhe Berna me 2.7% të papunë sillen rreth mesatares zvicerane të papunësisë.