Lajme

Parmelin në fjalimin e 1 Gushtit: “Shpresoj se më e keqja ka mbaruar”

"Pandemia ka nxjerrë jashtë ekuilibrit shumë njerëz", ka theksuar presidenti. Por ai ka shtuar se shpreson që më e keqja ka mbaruar

Presidenti Federal Guy Parmelin ka mbajtur në mbrëmjen e të shtunës, në Herzogenbuchsee të Bernës një nga katër fjalimet tradicionale të 1 gushtit, festës kombëtare të Zvicrës.

Ai me këtë rast ka vlerësuar guximin, solidaritetin dhe besimin me të cilin Zvicra po shikon drejt së ardhmes. Kjo formulë është provuar dhe testuar për 730 vjet, është shprehur Parmelin, shkruan albinfo.ch.

“Pandemia ka nxjerrë jashtë ekuilibrit shumë njerëz”, ka theksuar presidenti. Por ai ka shtuar se shpreson që më e keqja ka mbaruar dhe bashkë me të edhe koha e kufizimeve në vlerat thelbësore.

Presidenti Federal me këtë rast ka falënderuar punonjësit e shëndetit që ishin vazhdimisht në detyrë. Por jo vetëm ata: Parmelin ka vlerësuar lartë edhe zjarrfikësit që kanë punuar pa u lodhur gjatë stuhive që kanë prekur Zvicrën javëve të fundit.