Paul Nicaj: “Trump ka ndihmuar gjithmonë shqiptarët”

“Ka shumë shqiptarë që punojnë për të. Ai i ka ndihmuar shumë shqiptarët”, ka thënë Paul Nicaj për presidentin e ri të SHBA-vë, Donald Trump

Donald Trump është presidenti i 45-të i Shteteve të Bashkuara të Amerikës. Derisa Amerika udhëhiqej nga amerikanët, shqiptarët kishin përkrahje të madhe.

Megjithatë, përkrahja pritet të vazhdojë. Ai që e thotë këtë është Paul Nicaj, shqiptari i Malit të Zi me një histori suksesi në emigrim. Ai jeton në Nju Jork prej dekadash.

Mes vështirësive të fillimit të jetës së një emigranti, ai gjeti një punë në hotel “PLAZA” në kohën që administrohej nga Trump, ku arriti të bëhej pas një pune të përkushtuar, nga një ndihmës kamerier në menaxherin kryesor të tij.

“E kam nisur punën në hotel si zëvendës kamerier e më pas më kanë bërë menjëherë menaxher”, shprehet Paul Nicaj për “TCH”, përcjell albinfo.ch.

Nicaj rrëfen se ka pritur në “PLAZA”-n e Nju Jorkut disa nga presidentët e Shqipërisë, duke filluar që nga Ramiz Alia, Sali Berishën dhe Bamir Topin.

Siç tregon ai, vetë Trump ka treguar një bujari mjaft të madhe për ta. Por jo vetëm kaq, Donald Trump siç thotë Nicaj, i ka ndihmuar gjithmonë shqiptarët dhe aktualisht ka të punësuar në bizneset e tij qindra prej tyre.

“Ka shumë shqiptarë që punojnë për të. Ai i ka ndihmuar shumë shqiptarët. Ramiz Alia ka qenë i pari. Dhe flamurin e Shqipërisë e kanë vendosur për një javë në hotel. Pas Ramizit, ka ardhur edhe Sali Berisha, e më pas edhe Bamir Topi”, ka thënë Nicaj, i cili u shkëput nga hotel “PLAZA”, pas 30 vitesh dhe sot zotëron bizneset e tij në hoteleri, ku ka të punësuar rreth 600 shqiptarë.