Përfshirja në dosjen Epstein, shkak për dorëheqjen e Lajçakut

Ai ka mohuar rregullisht se ka pasur raporte të afërta me Epstein, por dosja e fundit, sipas dokumenteve të publikuara, dëshmon të kundërtën

Miroslav Lajçak, Ish-emisar evropian për dialog, është dorëhequr nga posti i këshilltarit të kryeministrit sllovak, pasi u konfirmua përfshirja e tij me Jeffrey Epstein.

Në dokumentet e lëshuara nga Departamenti Amerikan i Drejtësisë, emri i Lajçakut përmendet mbi 300 herë, raporton rtklive.com. Ai ka diskutuar me financierin amerikan, i akuzuar për trafikim seksual të të miturve, një sërë temash – nga çështje gjeopolitike deri te ato personale, përfshirë edhe gratë dhe vajzat e reja që, sipas dokumenteve, Epstein i ofronte në pronën e tij për persona të fuqishëm nga skena amerikane dhe ndërkombëtare.

Dokumentet tregojnë se Lajçak ishte ftuar në shtëpinë e Epstein në Florida, një rezidencë që tashmë njihet si vend ku, sipas hetimeve, kanë ndodhur abuzime ndaj vajzave të reja dhe janë organizuar festa të mbyllura për mysafirë me ndikim.

Miroslav Lajçak ka mohuar rregullisht se ka pasur raporte të afërta me Epstein, por dosja e fundit, sipas dokumenteve të publikuara, dëshmon të kundërtën.

Kryeministri sllovak Robert Fico ka konfirmuar se ka pranuar dorëheqjen e Lajçakut. Në korrespondencën me Epstein, Lajçak përmend edhe vetë Ficon, të cilin e ofron si zë të ekstremit të djathtë brenda Bashkimit Evropian.

Që nga rikthimi i tij në pushtet, Robert Fico është shfaqur si skeptik ndaj Bashkimit Evropian dhe NATO-s, me qëndrime pro-ruse dhe kritika të vazhdueshme ndaj mbështetjes për Ukrainën.

---