Përshëndetja hitleriane mund t`u kushtojë ushtarëve me nga 3 vjet burg!

Përshëndetjet “hitleriane” dhe kryqi i thyer mund t`u kushtojë gjashtë ushtarëve zviceranë me burg deri në 3 vjet . Organet ushtarake të drejtësisë kanë nisur procedurën përkatëse

Siç është shkruar javën e kaluar edhe në albinfo.ch, gjashtë ushtarë zviceranë në Wangen an der Aare kishin bërë një përshëndetje hitleriane (me krahun e djathtë të ngritur lartë) duke pasur përpara një kryq të thyer nazist të vizatuar në tokë. Të gjitha këto i kanë fotografuar ndërsa fotografia i ka rënë në duar gazetës “SonntagsBlick” e cila e ka publikuar.

“Ushtarët kanë marrë dënimet e tyre disiplinore duke u arrestuar. Ata po qëndrojnë prej disa ditësh në arrest i cili zgjat së paku edhe gjatë kësaj fundjave”, ka deklaruar zëdhënësi i ushtrisë Mirco Baumann.

Tre nga ushtarët kishin pasur në plan që të vazhdonin punën në ushtri, eshë pas përfundimit të shërbimit ushtarak të detyruar, përcjell albinfo.ch. Dhe kjo gjë tash pas incidentit të rëndë do t`u pamundësohet, ka thënë Baumann. Por, shërbimin ushtarak të rregullt ata mund ta vazhdojnë deri në fund.

Organet juridike të armatës duhet që në kuadrin e procedurës të vendosin nëse fotografitë e përmendura duhet të kategorizohen si propagandë naziste ose jo. Nëse do të kategorizohen ashtu, atëherë gjashtë ushtarët i pret një dënim për diskriminim racor prej deri në 3 vjet.

Martine Brunscwig Graf, kryetare e Komisionit Federal kundër Racizmit e konsideron “skandaloze” sjelljen e ushtarëve të përmendur. Por, ky nuk është rast i veçuar, ka theksuar ajo. Në vazhdimësi kemi ekstremistë të djathtë në ushtri, ka thënë ajo për “SonntagsBlick”. Këtë javë do të zhvillohet një takim me këshillimoren për ekstremizmin në ushtri me ç`rast do të bisedohet se si të identifikohen më lehtë këta persona gjatë rekrutimit.