Policia arreston dy shtetas të huaj për falsifikim parash

Dy shtetas të huaj janë arrestuar nga policia nën dyshimin për falsifikim parash.

Policia ka njoftuar se gjatë ditës së djeshme, ka pranuar një informatë se dy persona të dyshuar shtetas të huaj kanë tentuar të mashtrojnë pronarët e dy këmbimoreve në Prishtinë, duke tentuar të këmbejnë kartëmonedha të euros të dyshuara si të falsifikuara me kartëmonedha të dollarit amerikan.

“Gjatë kontrollit që ju është bërë personave të dyshuar, është vërejtur se të njëjtit posedojnë kartëmonedha (valuta nga shtete të ndryshme) tjera e të cilat  dyshohet se edhe ato janë të falsifikuara. Ekzistuar dyshimi i arsyeshëm se të dyshuarit kanë kryer veprën penale “Falsifikim i Parasë” sipas Kodit Penal të Republikës së Kosovës”, ka thënë policia.

Nga të dyshuarit në rast, gjithsej janë konfiskuar përkohësisht 4910 euro, 2484 dollar amerikan dhe 440 lira turke.

Me vendim të prokurorit të dyshuarit dërgohen në mbajtje për procedurë të mëtejme.