Policia gjermane dhe ajo kosovare dakordohen për rritje të bashkëpunimit

Me ftesë të presidentit të Policisë Federale të Gjermanisë, Dieter Roman, disa ditë po qëndron për vizitë zyrtare drejtori i Përgjithshëm i Policisë së Kosovës, Rashit Qalaj, i shoqëruar nga stafi i tij.

Në kuadër të vizitës që po realizohet në Gjermani, drejtori i Policisë së Kosovës u prit nga presidenti i Policisë Federale, Roman, të cilët në shenjë nderimi për policët e rënë në detyrë në Policinë Federale fillimisht vizituan memorialin e tyre, me ç’rast drejtori i Policisë, Qalaj, në shenjë respekti la një shkrim në librin e vizitorëve të Policisë Federale.

Dy udhëheqësit, ai i policisë gjermane dhe kosovare, Roman dhe Qalaj, janë dakorduar se bashkëpunimi bilateral mes dy policive do të rritet dhe dy institucionet do ta mbështesin njëra-tjetrën në këtë rrugëtim.

“Përvojat e mira të bashkëpunimit në mes të dy policive do të vazhdojnë dhe ato vetëm sa do të intensifikohen në fusha të ndryshme të sigurisë si: kontrolli kufitar, shkëmbimi i informacioneve, trajnimi në fusha të ndryshme të sigurisë, shkëmbimi i programeve në avancimin e Policisë dhe mbështetja në fusha të ndryshme të sigurisë”, thuhet në njoftimin e Policisë.