Polonia do të vendosë kontrolle në kufirin me Gjermaninë për të ndaluar migrantët e parregullt

Polonia të martën njoftoi se do të vendosë kontrolle të përkohshme nga data 7 korrik në kufijtë me Gjermaninë dhe Lituaninë për të ndaluar kalimet e parregullta të migrantëve, një temë e ndjeshme në marrëdhëniet me Berlinin.

“Konsiderojmë të nevojshme rikthimin e përkohshëm të kontrolleve në kufirin polako-gjerman për të kufizuar dhe ulur në minimum rrjedhën e pakontrolluar të migrantëve që kalojnë përpara e mbrapa,” tha kryeministri Donald Tusk për gazetarët.

Ai shtoi se do të vendosen kontrolle të ngjashme edhe në kufirin me Lituaninë.

“Jemi të vetëdijshëm se ky vendim sjell pasoja të caktuara në lirinë e lëvizjes së njerëzve. Nuk ka rrugë tjetër,” shtoi ai.

Gjermania kishte rivendosur kontrolle të përkohshme në kufirin me Poloninë në shtator dhe që atëherë Varshava ka akuzuar Berlinin për dërgimin mbrapsht në Poloni të migrantëve të parregullt që vijnë nga Polonia.

Imigracioni ishte një çështje kryesore politike në Poloni gjatë fushatës para zgjedhjeve presidenciale më 1 qershor, që u fituan nga kandidati nacionalist opozitar, Karol Nawrocki.

“Praktika në kufirin polako-gjerman ka ndryshuar dukshëm. Ana gjermane tani në fakt refuzon të lejojë hyrjen e migrantëve që synojnë të kërkojnë azil apo të marrin status tjetër,” tha Tusk.

“Ky ndryshim në praktikë në kufi ka sjellë tensione dhe një ndjenjë të drejtë asimetrie. Ne kemi mbrojtur Schengen-in dhe do të vazhdojmë të jemi mbështetës të një Europe pa kufij dhe kufizime, por duhet të ketë një vullnet të përbashkët dhe simetrik nga fqinjët tanë,” shtoi ai.

Tusk tha gjithashtu se rikthimi i kontrolleve në kufirin me Lituaninë është i nevojshëm për të ndaluar kalimet e migrantëve nga Bjellorusia.

Duke folur në Berlin, kancelari gjerman Friedrich Merz mohoi se ka rikthime të azilkërkuesve nga Gjermania në Poloni.

“Nuk ka raste të tilla,” tha ai.

“Jemi të vetëdijshëm për shqetësimet e qeverisë polake dhe dimë që tani Polonia dëshiron të kryejë kontrolle kufitare edhe me Lituaninë për të kufizuar kalimet e paligjshme nga Lituania në Poloni,” tha Merz.

Ai theksoi se ka një “bashkëpunim shumë të ngushtë, kolegjial dhe miqësor” me Tusk-un për këtë çështje.

“Kemi një problem të përbashkët. Po e zgjidhim së bashku,” përfundoi ai.

---