Jeta në Austri

Promovohet në Vjenë libri “Unterwegs in Albanien” i autores austriake

Është promovuar në Vjenë libri i autores austriake Franziska Tschinderle "Unterwegs in Albanien" (Një udhëtim nëpër Shqipëri).

Libri është pritur shumë mirë dhe supozon të zbulojë shumë detaje rreth Shqipërisë, të cilat mundësojnë këndvështrime të reja për lexuesin gjermanishtfolës. Libri ka karakter reportazhi, të ndërthurur me fakte historike.

Ky libër i shtëpisë botuese “Dumont Verlag” është një derë që u hapet vendeve gjermanishtfolëse, nëpërmjet të cilës ata mund ta shohin Shqipërinë me një sy tjetër si dhe ta njohin më afër se kurrë.

Ideja për të shkruar një libër rreth Shqipërisë ka ardhur si rrjedhojë e kandidaturës se saj për të hyrë në BE si dhe e interesit në këtë kuadër për të kuptuar gjendjen aktuale politiko-shoqërore, duke iu referuar të kaluarës historike.

“Ne s’mund të kuptojmë Shqipërinë e sotme pa kuptuar atë të djeshmen”, është shprehur Tschinderle në përurimin e librit.

Libri trajton disa nga temat më pikante rreth Shqipërisë, si: e kaluara komuniste, varfëria dhe ekonomia e dobët, problemet e drogës dhe të korrupsionit si dhe mungesa e perspektivës së të rinjve. Nga ana tjetër, autorja është munduar të flasë dhe për anë të mira si: natyra dhe bregdeti i bukur, njerëzit mikpritës, toleranca fetare etj.

“Në asnjë vend tjetër të Evropës nuk ndriçon dielli aq ditë sa në Shqipëri. E megjithatë ky libër nuk do të ofrojë vetëm Shqipërinë e broshurave të ilustruara turistike, por edhe anët e errëta të një vendi që cilësohet ndër më të varfrit në Evropë dhe që akoma nuk ka arritur të pajtohet me të kaluarën e vet”, e përshkruan Tschinderle librin e saj.

Në prezantimin e librit kanë qenë prezent përfaqësues të politikës si nga ana shqiptare, ashtu dhe ajo austriake.

Të interesuarit që dëshirojnë ta blejnë librin “Unterwegs in Albanien”, mund ta gjejnë duke klikuar këtu: https://www.thalia.de/shop/home/artikeldetails/ID148152065.html?fbclid=IwAR2Y8n73maqQ1Tw945Uap5_ZT3NP9Xr72XUybGfqAhHj-00-AHjhI1FpZlA