PS dhe Sindikatat: Reforma pensionale dëmton njerëzit me “paga normale”

Që iniciativa të hidhet në votim, nevojiten 50 mijë nënshkrime që duhet të grumbullohen më së largu deri në fillim të korrikut

Sindikatat dhe PS (Partia Socialdemokrate) kanë konfirmuar njoftimin e tyre. Ato, së bashku, fillojnë referendumin për reformën e fondit të pensioneve që ka miratuar pak muaj më parë Parlamenti i vendit, transmeton albinfo.ch.

Dy grupimet në fjalë e kanë justifikuar këtë veprim në një konferencë për media që kanë mbajtur sot në Bernë, shkruan srf.ch. Sipas tyre, reforma e miratuar nga Parlamenti çon në uljen e pensioneve dhe shkakton kosto shtesë për kuotën e “fituesve normalë”, kategorinë e të punësuarve me paga të ulëta dhe të mesme.

Shumica e Parlamentit kishte miratuar reformën, me qëllimin për të stabilizuar financiarisht fondet e pensioneve.

Sidoqoftë, që votuesit të mund të votojnë për reformën e fondit të pensioneve, komitetit të majtë i duhen 50 mijë nënshkrime që duhet të grumbullohen më së largu deri në fillim të korrikut.

---