Kosova

Qeveria reagon pas deklaratave të Bankës Botërore dhe Isa Mustafës

Banka Botërore ka publikuar një raport, në të cilin thuhet se ka rëndie të vendeve të punës në Kosovë.

Qeveria e Kosovës pas këtij raporti ka reaguar, duke thënë se është i pavërtetë dhe i pabazë.

“Qeveria e Republikës së Kosovës vlerëson se raporti i publikuar dje nga përfaqësuesi i Bankës Botërore në Kosovë, për sa i përket zvogëlimit të vendeve të punës në Kosovë në vitin 2018, për 17 mijë vende pune, është plotësisht i pavërtetë dhe i pabazuar. Të dhënat nga Agjencia e Statistikave të Kosovës, Banka Qendrore e Kosovës, por edhe Raporti Financiar për Shpenzimet e Buxhetit për vitin 2018 për zhvillimet makroekonomike në Kosovë flasin krejt ndryshe”, thuhet në komunikatën e qeverisë.

Në reagimin e Qeverisë së Kosovës përmendet edhe lideri i LDK-së, Isa Mustafa, i cili ishte përfshirë në këtë debat.

“Nuk na befason paraqitja e përfaqësuesit të BB-së me këto shifra, por jemi befasuar me gatishmërinë e kryetarit të LDK, z. Isa Mustafa, me profesion ekonomist, Profesor Universitar dhe akademik, për shfrytëzimin e këtij informacioni pa një analizë profesionale e kritike ashtu siç mendojmë se i takon. E kuptojmë nevojën e kritikës së opozitës për Qeverinë, por jo me çfarëdo mjeti dhe nga çfarëdo niveli”, thuhet tutje në reagim.

Sipas qeverisë: “Sipas të dhënave të publikuara së fundmi nga ASK lidhur me punësimin dhe strukturën e aktivitetit ekonomik të popullsisë, numri i të papunëve në vitin 2018 është zvogëluar për 11.611 persona, që do të thotë, shkalla e papunësisë është zvogëluar për 1% në krahasim me vitin 2017.Ecuritë makroekonomike në Kosovë në vitin 2018 ishin si vijon: norma e rritjes/shtimit/ekonomik 4.2%, investimet publike, rritje 13,1%, remitencat 6,0%, punësimi në sektorin publik 5,2%, investimet në sektorin privat 6,4%”.

Sipas qeverisë, raporti i Bankës Botërore nuk qartëson se me çfarë konstatimi kanë raportuar se janë humbur 17 mijë vende të punës.