Reagime të reja rreth stemave shqiptare në uniformat zvicerane

Edhe politikani shqiptarozviceran Arbër Bullakaj, nënkryetar i SP-së për Kantonin e St. Gallenit thotë se ushtarët që kanë bërë një veprim të tillë duhet të dënohen

Stema me shqiponjë dhe me portretin e Skënderbeut, e ngjitur në mëngën e uniformës ushtarake zvicerane, e cila u publikua pak ditë më parë në media sociale, vazhdon të shqetësojë shpirtrat në Zvicër. Gazeta “Blick” ka shkruar sërish sot në lidhje me reagimet e opinionit ndaj kësaj paraqitjeje që, bazuar në mbishkrimin e stemës konkrete, po identifikohet si “Zug shipi”.

“Ndonëse reaksionet janë të ashpra, fenomeni nuk është aspak i ri, po u shikuan me kujdes mediat sociale”, shkruan gazeta. Pastaj ajo përkujton se përveç rastit më të ri që bëri bujë më shumë, po në facebook kishte bërë xhiro (në vitin 2013) edhe një stemë e ngjashme në uniformën e një ushtareje me prejardhje shqiptare me mbishkrimin “Hello Shipi”, ku shihet një kukull me plis shqiptar,  një aludim me markën japoneze Hello Kitty, transmeton albinfo.ch. Ndërsa më të shpeshta në këtë drejtim janë syzhetë me shenjat e klubeve të futbollit që vendosen në vend të stemës zyrtare të njësitit konkret ushtarak.

Ndonëse të gjitha këto janë të ndaluara të përdoren gjatë shërbimit zyrtar, autoritetet ushtarake nuk është se mund të bëjnë shumë për ndalimin e kësaj paraqitjeje. Në internet secili ushtar me pak franga mund të dizajnojë një stemë dhe ta ngjesë atë në uniformë.

Për ushtrinë është e qartë, thotë zëdhënësi i saj Daniel Riest: , vendosja e shenjave të tilla është e ndaluar. I pyetur nga gazeta e përmendur, edhe politikani me rrënjë shqiptare Arbër Bullakaj, nënkryetar i SP-së për Kantonin e St. Gallenit thotë se ushtarët që kanë bërë një veprim të tillë duhet të dënohen, përcjell albinfo.ch. “Nisur nga fakti se një gjë e tillë është e ndaluar, një dënim disiplinor do të ishte i kuptueshëm”, ka thënë Bullakaj. “Në ushtri ka rregulla të cilat duhet respektuar. Dhe kush i shkel ato, do të sanksionohet. Por për sa kohë dënimi do të jetë adekuat dhe vepra të mos dramatizohet, kjo është në rregull.

Ndërsa sociologu ushtarak nga Akademia ushtarake e ETH, Tibor Scvirscev Tresch thotë se ky fenomen tregon për “identitetet e shumëfishta” të ushtarëve që prezantohen në këtë mënyrë. Ndonëse edhe ai është irrituar nga kjo, Tresch e relativizon dukurinë, duke thënë se tri raste të tilla nuk e rrezikojnë imazhin e ushtrisë, nëpër të cilën kalojnë 18 mijë ushtarë brenda vitit.  Ai po ashtu ka theksuar se ushtria gëzon imazh më të mirë te të rinjtë me prejardhje të huaj se sa te vetë zviceranët autoktonë.