Futboll

Reagon Lenjani pas zgjedhjeve të trajnerit të kombëtares shqiptare

Ermir Lenjani po kalon një moment të mirë të formës së tij në kampionatin helvet, teksa ka qenë vendimtar për shumë nga aksionet e Sionit, duke dhënë asiste të rëndësishme, por kjo nuk ka mjaftuar që të bindë trajnerin Kristian Panuçi për ta grumbulluar atë në dy sfidat e radhës të Kombëtares shqiptare kundër Turqisë e Andorrës.

Lenjani ka reaguar në profilin e tij në Instagram, duke iu kundërvënë ashpër zgjedhjeve të Panuçit dhe duke deklaruar se sa të jetë italiani në krye të stolit kuqezi, ai nuk do të veshë më fanellën e Kombëtares.

Reagimi i Lenjanit

“Që nga viti 2013 jam pjesë e Kombëtares shqiptare dhe ndihem krenar për këtë gjë. Saherë jam ftuar e kam pranuar ftesën me dëshirën më të madhe pasi çdo herë kur e kam veshur fanellën kuq e zi e kam veshur me shumë dashuri. Kam qenë gati gjithmonë, kam sakrifikuar shumë, jam gjakosur, kam qarë e kam qeshur si futbollist i Shqipërisë. Kam pranuar edhe stolin, por jam respektuar gjithmonë. Tani në dy vitet e fundit jam duke kaluar nëpër një formë shumë të mirë, por po injorohem nga trajneri momental i Kombëtares. Nuk kam luajtur asnjë minut në Ligën e Kombeve, por nuk kam bërë zhurmë dhe kam vazhduar të punoj edhe më fort. Kur lëndohen 4-5 lojtarë trajnerit i bie në mend që luan dikund Ermir Lenjani dhe më dërgon ftesë. Faleminderit, por JO. Me lot në sy e them se nuk do të grumbullohem më me Kombëtaren sa të jesh ti aty. Kam kontribuar shumë dhe meritoj respekt. Dashuria ime për Shqipërinë është më e madhe se urrejtja jote për mua. Unë kam qenë, jam dhe gjithmonë do të jem djal i Shqipërisë, ndërsa ti je vetëm kalimtar”.