Reagon Tahiri: Ndarja, destabilizon rajonin

Edita Tahiri: "Nuk do të vihet fare në tavolinë një ide e tillë, dhe asnjë temë tjetër politike"

Kryesuesja e ekipit të Kosovës, Edita Tahiri, ka reaguar ndaj deklaratës së shefit të ekipit serb në dialogun Kosovë-Serbi, Borko Stefanoviç, se shteti i tij është i gatshëm të flasë edhe për ndarjen e Kosovës.

Tahiri ka hedhur poshtë mundësinë që një temë e tillë të jetë pjesë e këtyre bisedimeve.

Ajo ka kujtuar se, asnjë palë s’mund të imponojë tema pa u pajtuar të trija palët që janë pjesë këtyre bisedimeve – Kosovës, Serbisë dhe ndërmjetësuesit Bashkimit Evropian.

Ndonëse dialogu Kosovë–Serbi është quajtur teknik, është pala serbe që po tenton të flasë edhe për çështje politike. Shefi ekipit serb në këto bisedime Borko Stefanoviç citohet nga mediat serbe të ketë deklaruar se shteti i tij është i gatshëm të flasë edhe për ndarjen e Kosovës.

“Nuk do të vihet fare në tavolinë një ide e tillë, dhe asnjë temë tjetër politike. Idetë e tilla janë destabilizuese për të gjithë rajonin dhe i takojnë politikave të vjetra hegjemoniste të Serbisë, e që nuk korrespondojnë me realitetin”, ka theksuar Tahiri.

Ajo ka ripërsëritur se koncepti i bisedimeve të filluara kohë më parë është i qartë për të gjitha palët, si dialog teknik, madje edhe nga Bashkimi Europian si ndërmjetësues.