Riola Xhemaili flet për raportin me Avdullahun, Shaqirin e Xhakën

Riola Xhemaili flet për karrierën, Avdullahun, Shaqirin dhe Xhakën

Futbollistja e PSV Eindhovenit, Riola Xhemaili, dhe vëllai binjak i saj, Rioni, kanë dhënë një intervistë të gjatë për mediumin zviceran “NZZ”, ku kanë folur për karrierën, jetën personale dhe lidhjen e tyre me Kosovën dhe Zvicrën, përcjell albinfo.ch.

Riola ka treguar se në moshë të re ka luajtur me Leon Avdullahun, ylli i ri i mesfushës së Kosovës, në ekipin U11 të Baselit kundër Luzernit. Vëllai i saj, Rioni, ka kujtuar momentet e hershme:

“Luajtëm me ekipin U11 kundër Luzernit. Riola shënoi një gol nga goditja e dënimit dhe një tjetër me kokë, por humbëm rreth 10:2. Gjatë rrugës për në shtëpi, shokët e ekipit thanë se Riola do të fitonte një ditë ‘Topin e Artë’. Mendova me vete: ‘Ajo është jashtëzakonisht e mirë’”, ka thënë Rioni, duke theksuar se futbollistja dallohej qartë edhe ndaj djemve të tjerë.

Riola ka treguar gjithashtu për sfidat që ka hasur si futbolliste me prejardhje nga Kosova:

“Kur shkojmë në Kosovë, njerëzit thonë: ‘Ata janë nga jashtë, nuk e dinë vërtet se si jetojmë këtu’. Në Zvicër, nëse bën diçka të mirë, je i shkëlqyer, por nëse ndodh diçka e keqe, fajin e gjejnë te prejardhja jote. Nuk mund t’i kënaqësh të gjithë, prandaj marr vendime që janë të drejta për mua dhe familjen.”

Pavarësisht lidhjeve të forta me Kosovën, futbollistja ka shpjeguar se nuk ka marrë kurrë ftesë nga Kosova për të luajtur, ndërsa nga viti 2020 është pjesë e përfaqësueses së Zvicrës, me 7 gola në 38 ndeshje deri më tani.

Xhemaili ka folur edhe për raportin me futbollistë të tjerë shqiptarë:

“Kur shënova gol kundër Finlandës në Evropian, Granit Xhaka dhe Xherdan Shaqiri më përgëzuan. Isha më e afërt me Shaqirin dhe gjithashtu njoh shumë mirë Leon Avdullahun. Çdo lojtar ka historinë e vet, dhe kjo është ajo që na lidh. Ndonjëherë më pyet veten pse besnikëria na kërkohet vetëm neve kosovarëve.”

Vëllai i saj, Rioni, ka përforcuar vlerësimin për Riolën:

“Riola është yll në Kosovë, njëqind për qind.”

Kjo intervistë zbulon jo vetëm sukseset e saj në fushë, por edhe përkushtimin dhe vendosmërinë për t’u afirmuar si futbolliste, duke ndërtuar një karrierë ndërkombëtare ndërsa mban lidhje të forta me rrënjët e saj kosovare.

---