Rritja e ekonomisë botërore, më e vogël se parashikimet

Për vitin 2016 ekspertët parashohin një rritje prej 2.9 për qind. Gjashtë muaj më parë qe parashikuar një rritje paksa më e madhe, gjegjësisht 3.1%

Një vlerësim i bërë nga OKB-ja ne një raport të ri thotë se ekonomia botërore, këtë vit dhe në vitet që vijnë, do të ketë një zhvillim më pak të vrullshëm se që ishte paramenduar deri tash. Kështu, për këtë vit (2015), raporti i OKB-së konsideron se do të kemi një rritje të ekonomisë botërore prej 2.4% në krahasim me vitin paraprak. Kjo përqindje është për 0.4 për qind më e vogël se ajo që ishte parashikuar në muajin maj të këtij viti.

Ndërsa për vitin 2016 ekspertët, autorë të raportit të përmendur të OKB-së parashohin një rritje prej 2.9 për qind dhe për vitin 2017, 3.2%. Gjashtë muaj më parë, për vitin 2016 qe parashikuar një rritje paksa më e madhe, gjegjësisht 3.1%, shkruan srf.ch.

Marrë veç e veç, gjithnjë sipas raportit të OKB-së, ekonomia e BE-së do të ketë në fund të vitit 2015 një rritje prej 1.9 për qind ndërsa ajo e SHBA-së, 2.4%. Ekonomia e Japonisë, me një rritje prej vetëm 0.5% përbën rastin më shqetësues në mesin e shteteve të fuqishme industriale.

Por, ajo që brengos më shumë ekspertët, hartues të raportit, është gjendja në vendet në zhvillim. Parashikimet janë që në fund të vitit 2015 ekonomia e tyre, marrë si tërësi, jo vetëm që nuk do të ketë rritje por ajo do të pësojë një rënie prej 2.8% ne kraasim me vitin paraprak.