Rrjedh gazi, humbin jetën të moshuarit në Elbasan

Një çift të moshuarish humbën jetën nga një rrjedhje gazi në banesë. Ngjarja ndodhi në fshatin Gjergjan të Elbasanit, pas mesnate.

Viktimat, 65-vjeçari Shyqyri L. dhe 61-vjeçarja Sabire L. ishin vetëm në banesë, në momentin e tragjedisë, përcjell albinfo.ch.

Sipas policisë, dyshohet se kryefamiljari ka hapur bombolën e gazit, e më pas i ka vendosur flakën. Si pasojë kanë marrë flakë disa orendi shtëpiake. Bashkëshortët dyshohet se kanë ndërruar jetë nga asfiksia, transmeton tch.

Nipi i tyre ka konstatuar zjarrin dhe ka shkuar menjëherë në banesë, duke u futur nga dritarja, por ka qenë tepër vonë për dy të moshuarit.

Fqinjët nga ana e tyre shprehen se familja Shyqo njihej si një çift i respektuar dhe me sjellje të mirë.

“Nuk na besohet. Ne i njohim për njerëz të mirë ata. E përcjellim me shumë dhimbje. Nuk dyshojmë për asnjë gjë, përveç të mirave.

Nusja e tij ka qenë e sëmurë, kishte një 1 vit e gjysmë apo 2 vite. Ai i shërbente vet. Madje kohët e fundit i mori edhe një njeri që i kryente shërbimet”, u shpreh njëri nga fqinjët.

Dyshimet janë që përveç një problem shëndetësor të gruas së tij, dy bashkëshortët kishin probleme edhe me femijët që jetonin jashtë vendit.

Njoftimi i Policisë

“Në fshatin Gjergjan, Elbasan, në banesë janë konstatuar pa shenja jete nga një i afërm i tyre shtetasit: V. Liçi, 65 vjeç, dhe bashkëshortja  e tij shtetasja S. Liçi, 61 vjeçe. Grupi hetimor në vendngjarje po punon për zbardhjen e plotë të rrethanave të ngjarjes, ku nga hetimet paraprake dyshohet se shtetasi V. Liçi ka hapur bombolën e gazit e më pas i ka vendosur flakën. Si pasojë  kanë marrë flakë disa orendi shtëpiake si dhe dyshohet nga asfiksia kanë  ndërruar jetë bashkëshortët. Nipi i tyre ka konstatuar zjarrin dhe ka shkuar menjëherë në banesë duke u futur nga dritarja por çifti kishte ndërruar jetë”.