Shaqiri flet si kapiten: I lumtur që do të udhëheq Zvicrën kundër Spanjës

Zvicra të premten do të ballafaqohet me Spanjën në çerekfinale të Evropianit

Zvicra do të luajë pa Granit Xhakën kundër Spanjës, për shkak të kartonëve. Në mungesë të Xhakës, kapiten do të jetë Xherdan Shaqiri, përcjell albinfo.ch.

“Unë vetëm mundohem të jem vetja. Do të mundohem ta ndihmoj ekipin me paraqitje të mirë. Ne jemi të fokusuar, e dimë çka duhet të bëjmë. Do të mundohemi të japim çdo gjë dhe vërtetë po shikojmë para për këtë. Nuk ndryshoj nëse kam shiritin në krah apo jo”, ka thënë Shaqiri.

“Ne ishim vërtetë të lumtur për fitoren ndaj Francës, por tani kemi një ndeshje tjetër të vështirë. Duhet të shkojmë përtej limiteve edhe njëherë”, shtoi tutje ylli shqiptar.

“Ndaj Spanjës do të jetë një tjetër ndeshje e fortë, por ne besojmë në aftësitë tona. Përballë Francës treguam se ndaj skuadrave të mëdha mund të shënojmë më shumë se një gol, madje tre të tillë, ndaj kjo na bën optimistë edhe për sfidën e ardhshme ndaj Spanjës”, deklaroi Shaqiri.

---