Literaturë

Shqipe Sylejmani sjell romanin e tretë: “Stolz und Widerstand” – Krenari dhe Rezistencë

E shtunë, 11 Tetor 2025 - 15:15 albinfo.ch

Pas “Barrë dhe bekim” dhe “Dinjitet dhe falje”, autorja shqiptaro-zvicerane Shqipe Sylejmani u rikthye këtë javë para lexuesve me romanin e saj të ri, të tretin me radhë: “Stolz und Widerstand” (Krenari dhe Rezistencë). Promovimi i librit u mbajt të enjten në ambientet e Labor5 në Cyrih, ku dhjetëra dashamirës të letërsisë u mblodhën për të festuar me autoren lindjen e një vepre të re.

Në një atmosferë të ngrohtë dhe përplot emocione, Sylejmani solli rrëfime për gratë nga Kosova, Shqipëria, Maqedonia e Veriut dhe Mali i Zi, gra që përballen me fatkeqësi, barrë, padrejtësi e heshtje, por që bartin në vetvete forcë, krenari dhe rezistencë. Romani sjell në dritë historitë e atyre që shpesh kanë mbetur në hije, por që përmes penës së autores marrin zë dhe dinjitet.

Shqipja ndau me publikun fragmente prekëse nga libri, duke i ndërthurur me momente muzikore. Leutrim Aliji në piano dhe Arjeta Zuta me zërin e saj të ngrohtë i dhanë mbrëmjes një dimension artistik të veçantë duke sjellë këngë nga atdheu dhe një ndjesi nostalgjie që mbushi sallën.

Dy vjet më parë, në të njëjtin ambient dhe me një publik po aq të përkushtuar, autorja kishte promovuar romanin “Dinjitet dhe falje”.

Atëbotë, personazhi kryesor, Shota, nisej në kërkim të rrënjëve shqiptare, duke përshkuar hapësira nga Italia e deri në SHBA. Me “Krenari dhe Rezistencë”, Sylejmani e zgjeron edhe më shumë universin e saj letrar – nga historia personale drejt një hymni për gruan shqiptare, për guximin dhe krenarinë e saj përballë kohëve të vështira.

E lindur në Prishtinë, Sylejmani erdhi në Zvicër si fëmijë katërvjeçare, pas përndjekjeve ndaj babait të saj, bashkëpunëtor i gazetës “Rilindja”. Gjatë studimeve për Gazetari dhe Komunikim në Cyrih, ajo punoi për disa revista të njohura në Zvicër dhe Nju Jork.

Pas suksesit të madh me “Barrë dhe bekim” dhe “Dinjitet dhe falje”, që u përkthyen edhe në gjuhën shqipe dhe angleze, romani i tretë “Krenari dhe Rezistencë” konfirmon pozitën e saj si një prej zërave më të rëndësishëm të letërsisë shqiptare në diasporë.

Lexoni po ashtu: