Shqipëri: Rriten me 40% daljet e shqiptarëve jashtë vendit për pushime

Gati 6 milionë shqiptarë dolën nga Shqipëria vitin e shkuar.

Bashkë me rekordin në hyrje, edhe shifrat e atyre që zgjodhën që t’i kalonin jashtë pushimet shënuan nivelet më të larta historike.

Të dhënat nga Instituti i Statistikave tregojnë se nga më pak se 4.2 milionë më 2021, shifra u rrit me mbi 40 për qind në 12-mujorin lënë pas.

Për kryetarin e Unionit Turistik Shqiptar, Rrahman Kasa, rritja i dedikohet sa shtimit të linjave direkte me çmime më të ulëta, aq edhe mungesës së kapaciteteve akomoduese në vend.

“Si arsyen kryesore do të rendisja lirimin e masave nga pandemia. Por, për pushimet familjare mendoj se çmimet më të lira të strukturave akomoduese në vendit e rajonit kanë joshur shumë shqiptarë”, shprehet Rrahaman Kasa, Unioni Turistik Shqiptar.

Të dhënat nga Banka e Shqipërisë tregojnë se shqiptarët nuk kanë kursyer as shpenzimet për pushime vitin e shkuar, të cilat përllogariten në mbi 1.3 miliardë euro.

Kjo shifër e parave të harxhuara është gati 30 për qind më e lartë se në po të njëjtin hark kohor të 2021-shit.

“Shqiptarët nuk njihen si “turistë të këqij”. Ne kemi disa lloj kategorizimesh në varësi të rajoneve. Ndonëse popull i varfër, shqiptarët nuk kursehen kur vjen puna te pushimet”, shprehet Kasa.

Pjesa më e madhe shqiptarëve që dolën nga vendi zgjodhën rajonin, kryesisht Malin e Zi e Maqedoninë e Veriut me paketa turistike ndjeshëm më të lira.

Gjithashtu, Madridi e Barcelona në Spanjë, Milano e Roma në Itali apo Abu Dhabi e Dubai në Emiratet e Bashkuara Arabe tërhoqën një pjesë të mirë të turistëve shqiptarë./A2