Shqiptarët dhe boshnjakët udhëtojnë lirshëm në Evropë

Qytetarët e Shqipërisë dhe të Bosnjës që nga sot do të lëvizin lirshëm në zonën e Shengenit. Muajin e kaluar ministrat e brendshëm të BE-së u pajtuan që të heqin vizat për këto dy shtete, por data e saktë nuk ishte e qartë.

Tanja Fajon, eurodeputetja e cila ndjek çështjet e Shengenit në Ballkan tha se procesi përmbyllet të mërkurën. Ajo tha se do të marrë pjesë në një ceremoni në Sarajevë dhe do të udhëtojë në Parlamentin Evropian të BE-së në Strasburg të Francës së bashku me një grup të qytetarëve boshnjakë, që do të kenë privilegjin të udhëtojnë pa viza.Duke filluar nga 15 dhjetori shtetasit e Shqipërisë dhe të Bosnjës munden të hyjnë pa viza edhe në Zvicër. Këtë vendim e kishte marrë me herët Qeveria Federale e Zvicrës. Edhe Zvicra, si shtet anëtare e Shengenit obligohet të zbatoj vendimin Parlamentit Evropian.

Qytetarët e Shqipërisë dhe Bosnjës do të kenë të drejtë qëndrimi deri në tre muaj në zonën e Shengenit. Me këtë rast ata nuk do të kenë të drejtë pune.

Një të drejtë shumë të kufizuar për punë e kanë tashmë qytetarët e vendeve të përmendura vetëm për personat me kualifikime të larta dhe për profesione për të cilat mbretëron mungesë në tregun e punës në Bashkimin Evropian dhe në vendet e EFTA-s.

Parlamenti Evropian dhe Këshilli i Unionit Evropian kanë vendosur më 24 nëntor lirimin nga detyrimi i vizës për qytetarët e Shqipërisë dhe Bosnjës e Hercegovinës.