Si imigracioni i sjell dobi Zvicrës

Sekretariati Shtetëror për Çështjet Ekonomike (SECO) beson se lëvizja e lirë e njerëzve, e cila u lejon qytetarëve të vendeve të BE-së dhe EFTA-s të punojnë në Zvicër, ka një efekt pozitiv në ekonominë e vendit

Lëvizja e lirë e njerëzve – marrëveshja e nënshkruar nga Zvicra me BE-në më 1999 – mbetet “e rëndësishme për të mbuluar kërkesën për punë të përshtatur me nevojat e sektorëve të ndryshëm ekonomikë”, tha Sekretariati Shtetëror për Çështjet Ekonomike (SECO).

“Rekrutimi i huaj ka ndihmuar në adresimin e mungesave në tregun e punës dhe në këtë mënyrë ka mbështetur zhvillimin ekonomik”, sipas SECO, përcjell albinfo.ch.

Ndërsa thirrja e SECO për punonjësit emigrantë i përket fuqisë punëtore nga vendet e BE / EFTA, ministri i Financave, Ueli Maurer, bëri një deklaratë të ngjashme, duke rekomanduar që Zvicra gjithashtu të pranojë më shumë emigrantë nga jashtë Bashkimit Evropian për të plotësuar disa vende të lira pune, veçanërisht në kërkime dhe IT.

Gjatë viteve, statistikat kanë treguar se sa të dobishëm janë emigrantët për ekonominë zvicerane. Që nga viti 2022, rreth një në katër banorë zviceranë është i huaj – një përqindje e cila është shumë më e lartë në qytetet më të mëdha si Cyrihu, Gjeneva dhe Bazeli, përcjell tutje albinfo.ch.

Në një raport të lëshuar në qershor 2020, bazuar në shifrat e vitit 2019, SECO nënvizoi ndikimin pozitiv që punëtorët nga BE dhe vendet e EFTA kanë pasur në tregun e punës të Zvicrës.

Këto janë disa nga gjetjet nga raporti i vitit 2020.

Fuqia punëtore migrante plotëson kërkesat e ekonomisë zvicerane

“Imigrimi nga BE/EFTA në Zvicër është i orientuar fuqimisht për nevojat e ekonomisë, siç theksohet nga niveli i lartë i pjesëmarrjes në tregun e punës”, tha SECO.

Shkalla e aktivitetit të shtetasve të BE-së ishte 87.7 për qind në 2019, krahasuar me 84.6 për qind për shtetasit zviceranë.

“Prandaj, imigracioni kontribuon ndjeshëm në rritjen e pjesëmarrjes së të huajve në jetën e punës në Zvicër”, thuhet në raport.

Por ndërsa zviceranët vendas punësohen më shpesh për punë që kërkojnë kualifikime më të larta profesionale, emigrantët angazhohen për poste që kërkojnë një nivel më të ulët kualifikimi, përcjell tutje albinfo.ch.

Kontribut pozitiv në fleksibilitetin e tregut të punës

Krahasuar me punonjësit vendas zviceranë, më shumë të huaj kanë punë të përkohshme dhe punojnë më shpesh gjatë natës ose në mbrëmje. “Ato ofrojnë një grup pune fleksibël për kompanitë që i nënshtrohen luhatjeve sezonale”, tha SECO.

Papunësia

Shkalla e papunësisë për njerëzit nga BE / EFTA mbetet mbi mesataren kombëtare. Kjo mund të shpjegohet me përqendrimin e punëtorëve të BE/EFTA në sektorë relativisht më të prekur nga papunësia, shpjegoi SECO.

Pagat

“Rritja e pagave në Zvicër mbetet gjerësisht e balancuar në lidhje me nivelet e ndryshme të arsimit”, thuhet në raport. “Megjithatë, paga mesatare e zviceranëve mbetet dukshëm më e lartë se paga mesatare e të gjithë punëtorëve”, shtoi SECO.

Ribashkimi familjar

Ndërsa qytetarët e vendeve të BE/EFTA vijnë në Zvicër për punësim, bashkimi familjar është arsyeja kryesore e imigrimit nga vendet e treta. “Shumica e anëtarëve të familjes që vijnë në Zvicër si pjesë e bashkimit familjar janë ekonomikisht të pavarur dhe marrin rrogë”.

Ndihma sociale

Integrimi profesional dhe përdorimi i ndihmës sociale janë të lidhura ngushtë, thuhet në raport.

Vetëm 3.4 për qind e emigrantëve nga BE/EFTA që mbërritën në Zvicër në vitin 2009 u mbështetën në ndihmën sociale brenda tetë viteve nga mbërritja e tyre.

Ka më pak rrezik për t’iu drejtuar ndihmës sociale me nivelin më të lartë të arsimit. Njerëzit nga vendet e BE / EFTA që kanë emigruar si pjesë e një bashkimi familjar dhe që varen nga ndihma sociale, “shpesh arrijnë të çlirohen shpejt dhe të rifitojnë pavarësinë ekonomike”, vëren SECO.

Rreth 2,125,410 shtetas të huaj ishin rezidentë në Zvicër në fund të marsit 2020, duke përfshirë 1,452 421 nga BE-ja, si dhe nga Norvegjia, Islanda dhe Mbretëria e Bashkuar.

Numri më i madh i të huajve vijnë nga Italia (15.3 për qind), Gjermania (14.6 për qind), Portugalia (12 për qind), Franca (6.7 për qind), Kosova (5.4 për qind) dhe Spanja (4 për qind).

 

---