Sot u përurua shkolla e vetme shqipe në Rozhajë të Malit të Zi

Në Mal të Zi sot është përuruar shkolla e vetme në Rozhajë, ku mësohet në gjuhën shqipe.

Në këtë përurim ka marrë pjesë edhe Kryeministri i Malit të Zi, Dritan Abazoviq, i cili tha se është hera e parë që një kryeministër i Malit të Zi vjen në këtë shkollë ku vijojnë mësimet 23 nxënës, teksa, sipas tij, punimet arrijnë vlerën e 250 mijë eurove.

“Po vazhdojmë të investojmë në arsim në gjithë vendin – një shkollë e re është hapur në Rozhajë! Është e vetmja shkollë në Rozhajë, ku mësimi zhvillohet në gjuhën shqipe. Ecim përpara, duke promovuar gjithëpërfshirjen”, ka shkruar ai në rrjetin social Facebook, përcjell albinfo.ch.

Në anën tjetër, ka reaguar edhe kryeministri i Shqipërisë, Edi Rama, i cili ka shpërndarë fotografitë nga pjesëmarrja e Abazoviqit në përurimin e shkollës në Rozhajë.

“Nga sot, vogëlushët në Rozhajë të Malit të Zi do të marrin dije në gjuhën shqipe në shkollën e sapopëruruar nga miku im, Dritani, më i miri i të tanëve”, ka shkruar ai.

 

---