Superliga e Zvicrës apo Superliga e shqiptarëve!

Në Superligën e Zvicrës paraqiten shumë futbollistë shqiptarë, duke shënuar gola, duke bërë asistime dhe duke qenë kyç në skuadrat ku luajnë

Numri i futbollistëve shqiptarë po rritet nga viti në vit në elitën e futbollit zviceran, derisa në këtë sezon po luajnë një numër i konsiderueshëm i tyre, duke qenë vendimtarë për skuadrat e tyre. Albinfo.ch ju sjell numrin e atyre që luajnë në Superligën e Zvicrës.

Xhaka dhe Ajeti

Te kampionët e Zvicrës, në Basel, prej disa vitesh luan Taulant Xhaka, duke qenë njëri nga lojtarët më me përvojë në këtë skuadër. Por, Xhaka nuk është i vetmi në Basel. Albian Ajeti është rikthyer në skuadrën ku është formuar. Ajeti ka treguar edhe një herë aftësitë e tij dhe në dy ndeshje realizoi dy gola. Te Baseli është rikthyer edhe Naser Aliji, i cili vetëm po stërvitet me kampionët e shumëfishtë të Zvicrës, por nuk përjashtohet mundësia që sërish të nënshkruajë me Baselin.

Te Young Boys paraqitet Taulant Seferi, i cili për shkak të lëndimit nuk po mund të japë kontributin e tij. Seferi luan për Shqipërinë U-21 dhe është një talent i madh i futbollit.

Sioni këtë vit është “vërshuar” nga futbollistët shqiptarë. Tashmë ish-trajneri Paolo Tramezzani kishte marrë tre futbollistë. Burim Kukelin dhe Ermir Lenjanin që luajnë për Kombëtaren shqiptare, si dhe Pajtim Kasami nga Olympiacos, që më herët luante për Zvicrën. Të tre lojtarët janë kyç në skuadrën zvicerane.

Te St. Gallen ishte Albian Ajeti, por ai shkoi në Basel, kurse tashmë në këtë skuadër luan Gjelbrim Taipi. Mesfushori është një futbollist kyç në skuadrën e tij.

Grasshoppersi me pesë shqiptarë

Nedim Bajrami

Mërgim Brahimi

Albion Avdijaj

Grasshoppersi mund të quhet edhe si ‘klubi i shqiptarëve’. Në këtë skuadër luajnë: Alban Pnishi, Nedim Bajrami, Arjan Qollaku, Valon Fazliu, Albion Avdijaj dhe Mërgim Brahimi. Pra, pesë futbollistë shqiptarë paraqiten në këtë skuadër, numër ky që është më i madhi i futbollistëve shqiptarë në një skuadër.

Benjamin Kololli

Andi Zeqiri

Në Lausanne luajnë Benjamin Kololli dhe një super lojtar siç është talenti Andi Zeqiri, i cili më herët ka qenë pjesë e të rinjve të Juventusit. Ai shihet si një talent i jashtëzakonshëm, madje duke u krahasuar me Xherdan Shaqirin. Zeqiri luan për grupmoshat e Zvicrës, kurse Kololli luan për Kosovën, dhe është një nga anësorët më të mirë të majtë.

Hekuran Kryeziu

Në Lugano luajnë mesfushori i Përfaqësueses së Kosovës, Hekuran Kryeziu, si dhe sulmuesi Shkëlqim Demhasaj. Ky i fundit ka realizuar tre gola deri më tani, duke dëshmuar se është një sulmues mjaft i mirë.

Edhe në Ligën e Parë të Zvicrës luajnë gjithashtu disa futbollistë shqiptarë.

Kujtojmë që nga Superliga e Zvicrës kanë dalë shumë yje shqiptarë, si Xherdan Shaqiri, Granit Xhaka, Migjen Basha, Amir Abrashi, Shkëlzen Gashi, si dhe shumë të tjerë.

 

 

 

 

 

---