Të huajt do të përfaqësojnë Vaud-in në Dhomën e Kantoneve?

Në rast se fiton iniciativa, të huajt mund të zgjidhen për të përfaqësuar kantonin dhomën e kantoneve të Parlamentit Nacional të Zvicrës

Më 4 shtator votuesit në kantonin Vaud do të japin votën e tyre që shtetasit e huaj të kenë të drejtë të votojnë dhe të zgjidhen në poste politike në nivel kantonal. Në rast se vendoset Pro, kjo do të ishte risi për gjithë Zvicrën.

Të huajt kanë të drejtë vote në nivel kantonal edhe sot në kantonet Jura dhe Neuchatel. Mirëpo, ata nuk kanë të drejtë që të kandidojnë dhe të zgjidhen në poste politike.

Ndërsa në Vaud, të huajt do të mund edhe të zgjidheshin për të përfaqësuar kantonin e tyre dhomën e kantoneve të Parlamentit Nacional të Zvicrës, shkruan 20minuten.ch. Këtë problematikë e rregullon ligji kantonal. Për këtë arsye kantoni Vaud, në rast votimi pozitiv, mund të marrë rolin e pionierit në fushë të realizimit të të drejtave të të huajve.

Sipas iniciativës që do të hidhet në votim më 4 shtator, të huajt duhet të kenë jetuar së paku 10 vite në Zvicër dhe më shumë se tre vjet në kantonin Vaud, që të fitojnë të drejtën aktive dhe pasive të zgjedhjes. Nga kjo do të përfitonin rreth 85000 persona, që në përqindje do të thotë 18% e njerëzve me të drejtë vote.

Iniciativën po e mbështesin Partia Socialdenmokrate, Të Gjelbrit, aleanca “A gauche toute” dhe Partia Demokristiane (CVP). Qëndrimi i tyre është se nuk është e drejtë që njerëzit të cilët jetojnë aq gjatë në Zvicër dhe paguajnë tatimet, të mos kenë të drejtë vendimmarrjeje në votime dhe referendume.

Nga ana tjetër, kundër kësaj të drejte janë partitë FDP (liberale), SVP-UDC, LDP dhe partia e Gjelbër Liberale. Këto apelojnë që, në rast se të huajt dëshirojnë të kenë të drejtë vote, ata mund të natyralizohen, pra të marrin shtetësinë zvicerane.

Po ashtu iniciativën e kanë kundërshtuar qeveria dhe parlamenti i kantonit.