Temperaturat përvëluese në Zvicër: Sot u regjistruan 39 gradë

Zvicra nën vapën përvëluese, temperaturat ngjiten deri në 39°C

Zvicra po përjeton kulmin e valës aktuale të të nxehtit. Gjatë së shtunës, temperaturat në zonat e ulëta pritet të arrijnë nga 34 deri në 38 gradë Celsius, ndërsa në disa rajone termometri mund të shënojë deri në 39 gradë, sipas MeteoNews, transmeton albinfo.ch.

Moti do të jetë kryesisht me diell gjatë gjithë ditës. Vetëm pasdite mbi zonat malore pritet të zhvillohen re të dendura, të cilat mund të sjellin stuhi lokale të shoqëruara me bubullima. Në mbrëmje, nuk përjashtohet mundësia që reshje dhe stuhi të izoluara të prekin edhe zonat fushore.

Megjithatë, pas këtij kulmi të vapës, moti pritet të ndryshojë gradualisht. Edhe e diela do të mbetet shumë e nxehtë, me temperatura nga 33 deri në 36 gradë, ndërsa në disa vende mund të arrijnë deri në 37 gradë Celsius.

Sipas MeteoSwiss, rreziku për stuhi do të rritet fillimisht në zonat malore, ndërsa në mbrëmjen e së dielës dhe gjatë natës drejt së hënës, reshje të dendura dhe stuhi të forta mund të përfshijnë edhe ultësirat. Në disa zona priten erëra të fuqishme dhe sasi të mëdha reshjesh.

Lehtësimi i parë nga vapa pritet të vijë të hënën. Temperaturat maksimale do të zbresin në rreth 28 gradë Celsius, rreth 6 deri në 10 gradë më pak krahasuar me kulmin e të nxehtit të së shtunës. /Albinfo.ch

---