Futboll

Trajneri zviceran që ngriti Kosovën

Një nga më të merituarit është trajneri zviceran, i cili ka krijuar disiplinë dhe ka marrë disa lojtarë mjaft cilësorë

Prej kur drejtimin e Kosovës e mori trajneri zviceran, Bernard Challandes, ‘Dardanët’ nuk dinë për humbje.

Kosova po dëshmon cilësitë çdo ditë, derisa më shumë se 1 vit nuk di për humbje, shkruan albinfo.ch.

Një nga më të merituarit është trajneri zviceran, i cili ka krijuar disiplinë dhe ka marrë disa lojtarë mjaft cilësorë. Fitorja e fundit ndaj Azerbajxhanit i ka dhënë të drejtën Kosovës të kualifikohet në Ligën C në Ligën e Kombeve, dhe në gjysmëfinale të “Final-Four” për Evropian do të ndeshet me Maqedoninë në Shkup.

Challandes ishte shumë i lumtur me fitoren e fundit. “Ishte e mrekullueshme që realizuam menjëherë. Ishte më e rëndësishmja që skuadra ishte e gatshme për luftë që nga fillimi. Është e mrekullueshme sepse mund të fitojmë. Të fitojmë dy ndeshje për Kampionatin Evropian. Është e mahnitshme. Tani kemi kualifikimet tjera, por në kokë gjysmëfinalja dhe pas saj ndoshta finalja. Është mirë për motivin e lojtarëve”, ka thënë Challandes pas ndeshjes.

Pas ndeshjes ka folur edhe Arbër Zeneli, i cili shënoi tre gola përballë Azerbajxhanit. “Falënderoj ekipin për topat e jashtëzakonshëm. Na shkoi shumë mirë. Luftuam shumë si ekip. Patëm gjithë vëmendjen për të fituar këtë ndeshje dhe jemi një nga katër ekipet në ‘Play-Off’”, ka thënë ai pas takimit.

Portieri i Kosovës, Arijanet Muriqi, ka thënë se është i lumtur për paraqitjen e parë para tifozëve të Kosovës.

“Dhamë gjithçka për të fituar këtë ndeshje. Ndjehem mirë. Kemi rezultat të mrekullueshëm. Ndihem shumë mirë për skuadrën”, ka thënë ai pas triumfit që çoi Kosovën në Ligën C.