Trump do të marrë pjesë në Forumin Ekonomik në Zvicër

Përkundër situatës së tensionuar me Iranin, presidenti amerikan do të jetë në Davos

Presidenti amerikan, Donald Trump, do të marrë pjesë në Forumin Ekonomik të Davosit, theksoi një zyrtar amerikan.

Drejtuesi i Shtëpisë së Bardhë pritet në stacionin e Alpeve zvicerane më 21 dhe 22 janar, përcjell albinfo.ch.

Vitin e kaluar ai anuloi pjesëmarrjen e tij në momentin e fundit për shkak të “shutdown”-it që kishte paralizuar administratën federale amerikane.

Mes anëtarëve të delegacionit amerikan që do të shkojnë këtë vit në Davos bëjnë pjesë vajza dhe këshilltarja e presidentit amerikan, Ivanka Trump, si dhe dhëndri dhe këshilltari, Jared Kushner, transmeton ATSH.

Sekretari i Thesarit, Steven Mnuchin, ministri i Tregtisë, Wilbur Ross dhe përfaqësuesi i Tregtisë, Robert Lighthizer do të jenë gjithashtu të pranishëm.

---